സവർക്കറുടെ ചിത്രം മതനിരപേക്ഷ മനസുകൾക്ക് ആശ്ചര്യം, കോൺഗ്രസുകാർക്ക് അത് ആവേശമെന്നും മുഖ്യമന്ത്രി
Sep 22, 2022, 21:00 IST
തിരുവനന്തപുരം: കോൺഗ്രസ്സ് നേതാവ് രാഹുൽ ഗാന്ധി നയിക്കുന്ന ഭാരത് ജോഡോ യാത്രയുടെ ബാനറിൽ സവർക്കറുടെ ചിത്രം മതനിരപേക്ഷ മനസുകൾക്ക് ആശ്ചര്യമാണ് ഉണ്ടാക്കിയതെങ്കിലും, കോൺഗ്രസുകാർക്ക് അത് ആവേശമാണെന്ന് മുഖ്യമന്ത്രി പിണറായി വിജയൻ. രാഹുൽ ഗാന്ധിയുടെ യാത്ര ബിജെപിക്കെതിരെ അല്ലെന്നും മുഖ്യമന്ത്രി കൂട്ടിച്ചേർത്തു. അറിയപ്പെടുന്ന കോൺഗ്രസ്‌ നേതാവാണ്‌ സ്വാതന്ത്ര്യ സമര സേനാനികളുടെ ഫോട്ടോയ്‌ക്കൊപ്പം സവർക്കറുടെ ചിത്രം വയ്‌ക്കുന്നത്. രാഹുൽ ഗാന്ധി നടത്തം ആരംഭിച്ചപ്പോൾ ഗോവയിലുണ്ടായിരുന്ന കോൺഗ്രസും ഇല്ലാതാകുന്ന സ്ഥിതിയായി. എംഎൽഎമാർ കൂട്ടമായി ബിജെപിയിലേക്ക്‌ ചേക്കേറി. അപ്പോഴും കേരളത്തെ ഇടതുപക്ഷത്തുനിന്ന്‌ അടർത്തിയെടുക്കാനാകുമോയെന്നാണ്‌ രാഹുൽ ഗാന്ധിയുടെ നൊട്ടമെന്നും പിണറായി പറഞ്ഞു. സ്വാതന്ത്ര്യ സമര ഘട്ടത്തിലാണ്‌ ആർഎസ്‌എസ്‌ പിറന്നുവീഴുന്നത്‌. അവർ എന്നും വർഗീയതമാത്രം പ്രചരിപ്പിച്ചു. ആദ്യം ദ്വിരാഷ്‌ട്ര വാദം ഉന്നയിക്കുന്നത്‌ സവർക്കറാണെന്നും മുഖ്യമന്ത്രി കൂട്ടിച്ചേർത്തു.