ദ്രൗപദി മുർമു ഇന്ന് നാമനിർദേശ പത്രിക സമർപ്പിക്കും
Jun 24, 2022, 09:40 IST
ന്യൂഡൽഹി: എൻഡിഎയുടെ രാഷ്ട്രപതി സ്ഥാനാർഥി ദ്രൗപദി മുർമു ഇന്ന് നാമനിർദേശ പത്രിക സമർപ്പിക്കും. പ്രധാനമന്ത്രി നരേന്ദ്ര മോദി, കേന്ദ്രമന്ത്രിമാർ, ബിജെപി നേതാക്കൾ എന്നിവരുടെ പിന്തുണയോടെയാണ് ദ്രൗപദി മുർമു പത്രിക സമർപ്പിക്കുക. രാഷ്ട്രപതിസ്ഥാനത്തേക്ക് പിന്തുണയാവശ്യപ്പെട്ട് ദേശീയ നേതാക്കളുമായി മുർമു കൂടിക്കാഴ്ച നടത്തും.പ്രധാനമന്ത്രി നരേന്ദ്ര മോദിയുമായി ദ്രൗപദി മുർമു ഇന്നലെ കൂടിക്കാഴ്ച നടത്തി. സമൂഹത്തിന്റെ അടിസ്ഥാനപ്രശ്നങ്ങൾ മനസിലാക്കിക്കൊണ്ട് രാജ്യത്തിന്റെ വികസനത്തെ സംബന്ധിച്ച വ്യക്തമായ കാഴ്ചപ്പാടുള്ള നേതാവാണ് ദ്രൗപദി മുർമു എന്ന് പ്രധാനമന്ത്രി മോദി പറഞ്ഞു. മുർമുവിനെ രാഷ്ട്രപതി സ്ഥാനാർഥിയായി തെരഞ്ഞെടുത്ത എൻഡിഎയുടെ തീരുമാനത്തെ നേതാക്കൾ അനുമോദിച്ചതായും പ്രധാനമന്ത്രി പറഞ്ഞു.