നടിയെ ആക്രമിച്ച കേസ്; സെഷന്‍സ് കോടതി പരിഗണിക്കരുതെന്നു പ്രോസിക്യൂഷൻ
Aug 6, 2022, 13:28 IST
കൊച്ചി: നടിയെ ആക്രമിച്ച കേസ് പരിഗണിക്കാന്‍ സെഷന്‍സ് കോടതിക്ക് അധികാരമില്ലെന്ന് പ്രോസിക്യൂഷന്. കേസ് സെഷന്‍സ് കോടതി പരിഗണിക്കരുതെന്ന് ആവശ്യപ്പെട്ട് അതിജീവിതയും കോടതിയെ സമീപിച്ചു. നടിയെ ആക്രമിച്ച കേസില്‍ തുടര്‍ വിസ്താര നടപടികള്‍ക്കായി ഇന്ന് എറണാകുളം പ്രിന്‍സിപ്പല്‍ സെഷന്‍സ് കോടതിയില്‍ എത്തിയപ്പോഴാണ് അതിജീവിതയും പ്രോസിക്യൂഷനും ഇക്കാര്യം ചൂണ്ടിക്കാട്ടിയത്. സെഷന്‍സ് കോടതി ജഡ്ജി ഹണി.എം.വര്‍ഗീന് മുന്നില്‍ ഇരുകൂട്ടരും ഇതുസംബന്ധിച്ച അപേക്ഷ സമര്‍പ്പിച്ചു.ഹണി എം. വര്‍ഗീസ് എറണാകുളം പ്രിന്‍സിപ്പല്‍ സെഷന്‍സ് ജഡ്ജിയായപ്പോള്‍ കേസ് രേഖകള്‍ സെഷന്‍സ് കോടതിയിലേക്ക് മാറ്റിയിരുന്നു. ഇക്കാര്യം പ്രോസിക്യൂഷനെയും പ്രതിഭാഗത്തെയും രേഖാമൂലം അറിയിച്ചു. കേസില്‍ ഇന്ന് വിചാരണ ആരംഭിക്കാനിരുന്നതാണ്. നിലവില്‍ വിചാരണ നടത്തിയ സി ബി ഐ പ്രത്യേക ജഡ്ജിയായിരുന്ന ഹണി എം വര്‍ഗീസ് സ്ഥാനക്കയറ്റം ലഭിച്ച് സെഷന്‍സ് ജഡ്ജിയായതിനെ തുടര്‍ന്നാണ് കോടതി മാറ്റം.സെഷന്‍സ് കോടതിയിലേക്ക് കേസ് മാറ്റരുതെന്നാവശ്യപ്പെട്ട് അതിജീവിത ഹൈക്കോടതിയില്‍ അപേക്ഷ നല്‍കിയെങ്കിലും അനുവദിച്ചിരുന്നില്ല.