സംസ്ഥാന സ്കൂള് കായിക മേള നടക്കുക പകലും രാത്രിയുമായി
![സംസ്ഥാന സ്കൂള് കായിക മേള നടക്കുക പകലും രാത്രിയുമായി](https://timeskerala.com/static/c1e/client/91214/uploaded/52944c4529933ef6a8a439c1ff139973.jpg)
തിരുവനന്തപുരം: സംസ്ഥാന സ്കൂള് കായികമേള രാത്രിയും പകലുമായി നടത്താൻ തീരുമാനം. ഇതിനായുള്ള ഒരുക്കങ്ങള് പൂര്ത്തിയായി. ഒക്ടോബര് 16 മുതല് 20 വരെ തൃശ്ശൂര് കുന്നംകുളം ഗവ. വൊക്കേഷണല് ഹയര് സെക്കന്ഡറി സ്റ്റേഡിയത്തിലാണ് മത്സരം നടക്കുന്നത്. മന്ത്രി വി. ശിവന്കുട്ടി മേളയുടെ ക്രമീകരണം വിലയിരുത്തി.
![](https://timeskerala.com/static/c1e/static/themes/16/91214/3752/images/New-Creative-.png)
ആറുവിഭാഗങ്ങളിലായി 3000 വിദ്യാര്ഥികള് മത്സരങ്ങളിൽ പങ്കെടുക്കും. രാജ്യത്ത് ആദ്യമായി സംസ്ഥാന സ്കൂള് കായികോത്സവം പകലും രാത്രിയുമായി നടത്തിയത് കഴിഞ്ഞ വർഷം കേരളത്തിലാണ്. ഇതേ മാതൃകയാണ് ഇക്കുറിയും തുടരുക. ആകെ 98 ഇനങ്ങളിലാണ് മത്സരം.
ദേശീയ സ്കൂള് കായികമേള നവംബര് രണ്ടാംവാരവും 37-ാമത് ദേശീയ ഗെയിംസ് ഒക്ടോബര് 25 മുതല് നവംബര് 9 വരെയും നടക്കുന്നതിനാലാണ് കായികോത്സവം നേരത്തേ നടത്തുന്നത്. മത്സരത്തിനായി ഡിസ്പ്ലേ ബോര്ഡ്, ഫോട്ടോ ഫിനിഷ് ക്യാമറ, വിന്ഡ് ഗേജ്, ഫൗള് സ്റ്റാര്ട്ട് ഡിറ്റക്ടര്, സ്റ്റാര്ട്ട് ഇന്ഡിക്കേറ്റ് സിസ്റ്റം, എല്.ഇ.ഡി. വാള് എന്നിവയും സജ്ജീകരിക്കും.