ഒരു കളിയെങ്കിലും ഒന്ന് തോൽക്കുമോ.? എതിരാളികൾക്ക് ഗോളടിക്കനെങ്കിലും ഒരു അവസരം നൽകാമോ.? ലിവർപൂളിന് കത്തെഴുതി മാഞ്ചസ്റ്ററിന്റെ പത്തുവയസുകാരൻ ആരാധകൻ; ക്ലബ്ബിന്റെ മറുപടി ഇങ്ങനെ…
ഇംഗ്ലീഷ് പ്രീമിയർ ലീഗിൽ അജയ്യരായി കുതിപ്പ് തുടരുന്ന ലിവർപൂളിന് മാഞ്ചസ്റ്റർ യുണൈറ്റഡിന്റെ കുഞ്ഞ് ആരാധകൻ എഴുതിയ കത്താണ് ഇന്ന് ഫുട്ബോൾ ലോകത്ത് ചർച്ചയാകുന്നത്. ഒരു കളിയെങ്കിലും ഒന്ന് തോൽക്കണം. എതിരാളികൾക്ക് ഗോളടിക്കനെങ്കിലും ഒരു അവസരം നൽകണമെന്നാണ് കോച്ച് യാർഗൻ ക്ലോപിനയച്ച കത്തിൽ പത്തുവയസുകാരൻ ഡാരഗ് ആവശ്യപ്പെട്ടിരിക്കുന്നത്.
”ഇഷ്ടം പോലെ മത്സരങ്ങളാണ് ലിവർപൂൾ ജയിച്ചത്. ഇനി ഒൻപത് മത്സരം കൂടി ജയിച്ചാൽ ചരിത്രമാകുമത്. യുണൈറ്റഡ് ആരാധകനെന്ന നിലയിൽ സഹിക്കാൻ പറ്റുന്നതിനുമപ്പുറമാകും അത്. സീസൺ മുഴുവൻ തോൽക്കണമെന്നോ ഇനി ജയിക്കാൻ വേണ്ടി കളിക്കരുതെന്നോ അല്ല പറയുന്നത് ഒരു കളിയിൽ മാത്രം ഒന്ന് തോറ്റ് തരൂ” ഡാരെഗ് കത്തിൽ കുറിച്ചു.
എന്നാൽ അങ്ങനൊരു കാര്യത്തെ കുറിച്ച് ചിന്തിക്കുകയേ വേണ്ട. സാധ്യമല്ല എന്നാണ് ലിവർപൂൾ നൽകിയ മറുപടി. ‘ലിവർപൂൾ തോൽക്കണമെന്നാണ് നിങ്ങളുടെ ആഗ്രഹം അതുകൊണ്ട് തന്നെ സ്വീകരിക്കാവുന്ന അപേക്ഷ അല്ലെന്നും ലിവർപൂൾ ആരാധകരെ നിരാശരാക്കില്ലെന്നും’ ക്ലോപ് മറുപടി നൽകി.
ഇംഗ്ലീഷ് പ്രീമിയർ ലീഗിൽ 26 മത്സരം കളിച്ച ലിവർപൂൾ 25 ലും ജയിച്ചു. ഒന്നിൽ സമനിലയും പിടിച്ചു. 76 പോയിന്റോടെ പട്ടികയിൽ ബഹുദൂരം മുന്നിലാണ് ലിവർപൂൾ.