കോന്നി മെഡിക്കല്‍ കോളജിന് പ്രവർത്തനപദ്ധതി തയാറാക്കും
കോന്നി: കോന്നി മെഡിക്കല്‍ കോളജിന്റെ സുഗമമായ നടത്തിപ്പിനായി ഓപ്പറേഷന്‍ പ്ലാന്‍ സജ്ജമാക്കും. ആശുപത്രി വികസനസമിതി ചെയര്‍മാനും കലക്ടറുമായ എസ്. പ്രേം കൃഷ്ണന്റെ അധ്യക്ഷതയില്‍ മെഡിക്കല്‍ കോളജ് ഹാളില്‍ വിളിച്ചുചേർത്ത ആശുപത്രി വികസന സമിതി യോഗത്തിലാണ് തീരുമാനമെടുത്തത്.
നിർദേശങ്ങളും ജീവനക്കാരുടെ ആവശ്യങ്ങളും ഉൾക്കൊള്ളിച്ച് 10 ദിവസത്തിനകം പ്ലാന്‍ തയ്യാറാക്കി സമര്‍പ്പിക്കാന്‍ പ്രിന്‍സിപ്പലിനെ യോഗം ചുമതലപ്പെടുത്തി. നിര്‍മാണ പ്രവൃത്തികള്‍ സമയബന്ധിതമായി പൂര്‍ത്തീകരിക്കാൻ കൃത്യമായ ഇടവേളകളില്‍ യോഗം ചേര്‍ന്ന് പുരോഗതി വിലയിരുത്താനും യോഗം തീരുമാനിച്ചു.
കൃത്യമായ സമയക്രമം പാലിച്ച് ഏറ്റെടുത്തിരിക്കുന്ന പ്രവൃത്തികള്‍ പൂര്‍ത്തിയാക്കണമെന്ന് നിര്‍മാണ കമ്പനികളുടെ പ്രതിനിധികള്‍ക്ക് യോഗം നിര്‍ദ്ദേശിച്ചു. സംസ്ഥാന സര്‍ക്കാര്‍ കിഫ്ബിയില്‍ നിന്ന് അനുവദിച്ച 350 കോടി രൂപയുടെ നിര്‍മാണ പ്രവര്‍ത്തനങ്ങളാണ് നിലവില്‍ ആശുപത്രിയില്‍ നടക്കുന്നത്.