പത്തനംതിട്ടയിൽ 14 വയസുകാരനെ കാണ്മാനില്ല: സിനിമയിൽ അഭിനയിക്കാൻ പോകുന്നു, അഞ്ചു വർഷങ്ങൾക്കു ശേഷം മടങ്ങിയെത്തുമെന്ന് കുറിപ്പ്
May 15, 2024, 14:55 IST
പത്തനംതിട്ട: 14 വയസുകാരനെ പത്തനംതിട്ട മല്ലപ്പള്ളിയിൽ നിന്നും കാണാതായി. കുട്ടിയെ കാണാതാകുന്നത് ചൊവ്വാഴ്ച മുതൽ ആണ്. കാണാതായത് മല്ലപ്പള്ളി മഞ്ഞത്താനം സ്വദേശി അഭിലാഷിന്‍റെ മകൻ ആദിത്യൻ അഭിലാഷിനെയാണ്. പുലർച്ചെ 6.30ന് ട്യൂഷന്‍ സെന്‍ററിലേക്ക് പോയ കുട്ടി വീട്ടിൽ തിരികെയെത്താത്തതിനെ തുടർന്ന് തിരച്ചിൽ നടത്തുകയായിരുന്നു. തുടർന്ന് ആദിത്യൻ്റെ സൈക്കിൾ മല്ലപ്പള്ളി ബസ്റ്റാൻഡിനരികിൽ നിന്നും കണ്ടെടുത്തു. കുട്ടി പോയത് താൻ സിനിമയിൽ അഭിനയിക്കാൻ പോവുകയാണ്, അഞ്ചു വർഷങ്ങൾക്കു ശേഷം മടങ്ങിയെത്താമെന്ന് കത്തെഴുതി വച്ച ശേഷമാണ്. കൂടാതെ, ജോലി ചെയ്ത് പണമുണ്ടാക്കി മാതാപിതാക്കൾക്ക് നൽകുമെന്നും കത്തിൽ സൂചിപ്പിക്കുന്നു. കീഴ്‍വായ്പുർ പോലീസ് മാതാപിതാക്കളുടെ പരാതിയിൽ അന്വേഷണം തുടങ്ങി.