കൊൽക്കത്ത: ദക്ഷിണ 24 പർഗാനാസ് ജില്ലയിൽ പതിനൊന്നുകാരിയായ പെൺകുട്ടിയെ പീഡിപ്പിച്ചു കൊലപ്പെടുത്തിയെന്നാരോപിച്ച് ആൾക്കൂട്ടം തല്ലിക്കൊന്ന ഇന്ദ്രജിത്ത് മണ്ഡലിന്റെ കുടുംബത്തിന് സഹായവുമായി പശ്ചിമ ബംഗാൾ മുഖ്യമന്ത്രി സുവേന്ദു അധികാരി (West Bengal Lynching). മണ്ഡലിന്റെ കുടുംബാംഗങ്ങളെ സന്ദർശിച്ച മുഖ്യമന്ത്രി, അദ്ദേഹത്തിന്റെ സഹോദരന് സിവിക് വോളണ്ടിയർ തസ്തികയിൽ നിയമന ഉത്തരവും രക്ഷിതാക്കൾക്ക് 25 ലക്ഷം രൂപയുടെ ചെക്കും കൈമാറി. ഇന്ദ്രജിത്ത് മണ്ഡൽ നിരപരാധിയാണെന്നും അദ്ദേഹത്തെ കൊലപ്പെടുത്തിയവർക്കെതിരെ കൊലക്കുറ്റത്തിന് കേസെടുക്കുമെന്നും മുഖ്യമന്ത്രി നേരത്തെ വ്യക്തമാക്കിയിരുന്നു.
ജൂലൈ 4-ന് കാണാതായ 11 വയസ്സുകാരിയുടെ മൃതദേഹം പിറ്റേദിവസം സുർജാപൂർ ഹാട്ട് മേഖലയിലെ ഒരു കുളത്തിൽ ചാക്കിൽ കെട്ടിയ നിലയിൽ കണ്ടെത്തുകയായിരുന്നു. ഇതേത്തുടർന്ന് പ്രകോപിതരായ നാട്ടുകാർ ബറൂയിപ്പൂർ-ജോയനഗർ റോഡ് ഉപരോധിക്കുകയും പോലീസ് വാഹനങ്ങൾ തകർക്കുകയും ചെയ്തിരുന്നു. ഈ സംഭവത്തിന് പിന്നാലെയാണ് പെൺകുട്ടിയുടെ മരണത്തിൽ പങ്കുണ്ടെന്ന് ആരോപിച്ച് ഇന്ദ്രജിത്ത് മണ്ഡലിനെ ആൾക്കൂട്ടം മർദ്ദിച്ച് കൊലപ്പെടുത്തിയത്.
പെൺകുട്ടിയെ പീഡിപ്പിച്ചു കൊലപ്പെടുത്തിയ കേസിൽ നാല് പേരെ പോലീസ് അറസ്റ്റ് ചെയ്തിട്ടുണ്ട്. ഇതിൽ പ്രഭാഷ് മണ്ഡൽ എന്ന പ്രതി പോലീസിന്റെ തോക്ക് തട്ടിയെടുക്കാൻ ശ്രമിക്കുന്നതിനിടെ നടന്ന ഏറ്റുമുട്ടലിൽ കൊല്ലപ്പെട്ടു. പെൺകുട്ടിയുടെ കൊലപാതകത്തിന് പിന്നാലെ നടന്ന അക്രമ സംഭവങ്ങളുമായി ബന്ധപ്പെട്ട് ഇതുവരെ 35-ഓളം പേരെ പോലീസ് അറസ്റ്റ് ചെയ്തിട്ടുണ്ട്. ആൾക്കൂട്ട കൊലപാതകത്തിൽ ഉൾപ്പെട്ട അഞ്ച് പേരെയും പിടികൂടിയതായി പോലീസ് അറിയിച്ചു. ഇരയായ പെൺകുട്ടിയുടെ കുടുംബത്തിനും എല്ലാവിധ സഹായങ്ങളും മുഖ്യമന്ത്രി വാഗ്ദാനം ചെയ്തിട്ടുണ്ട്.
Summary: West Bengal Chief Minister Suvendu Adhikari provided a government job and Rs 25 lakh in compensation to the family of Indrajit Mondal, who was lynched by a mob after being falsely suspected of involvement in the rape and murder of an 11-year-old girl in South 24 Parganas. The Chief Minister affirmed Mondal’s innocence and assured strict legal action against those responsible for the lynching, while the investigation into the girl’s murder continues with multiple arrests made.
