ചെന്നൈ: ഇന്ത്യൻ രാഷ്ട്രീയ ചരിത്രത്തിൽ പുതിയൊരു പാർട്ടി രൂപീകരിച്ച് ചുരുങ്ങിയ കാലയളവിനുള്ളിൽ ജനപിന്തുണ നേടി അധികാരം പിടിച്ചെടുക്കുന്ന അപൂർവ്വ നേട്ടം കൈവരിച്ച് നടൻ വിജയ് (Vijay TVK Election Results). എം.ജി.ആർ, എൻ.ടി.ആർ, അരവിന്ദ് കെജ്രിവാൾ എന്നിവർക്ക് ശേഷം ആദ്യ തിരഞ്ഞെടുപ്പിൽ തന്നെ തകർപ്പൻ വിജയം നേടിയ നേതാക്കളുടെ പട്ടികയിൽ നാലാമനായി വിജയ് ഇടംപിടിച്ചു. തമിഴക വെട്രി കഴകത്തിന് നിയമസഭയിൽ കേവല ഭൂരിപക്ഷം ലഭിച്ചില്ലെങ്കിലും മറ്റ് ചില കക്ഷികളുടെ പിന്തുണയോടെ വിജയ് തമിഴ്നാട് മുഖ്യമന്ത്രിയായി ചുമതലയേൽക്കും.
1972-ൽ എ.ഡി.എം.കെ രൂപീകരിച്ച എം.ജി.ആർ 1977-ൽ നേരിട്ട ആദ്യ തിരഞ്ഞെടുപ്പിൽ 30.36 ശതമാനം വോട്ടോടെയാണ് അധികാരം പിടിച്ചത്. ആന്ധ്രയിൽ പാർട്ടി തുടങ്ങി ഒമ്പത് മാസത്തിനുള്ളിൽ എൻ.ടി.ആർ 46.30 ശതമാനം വോട്ട് നേടി കോൺഗ്രസ് കോട്ട തകർത്തു. ഡൽഹിയിൽ 2013-ൽ 29.49 ശതമാനം വോട്ട് നേടിയാണ് കെജ്രിവാൾ ആദ്യമായി മുഖ്യമന്ത്രിയായത്. ഈ ചരിത്രനേട്ടങ്ങളെയും മറികടക്കുന്ന പ്രകടനമാണ് തമിഴ് മണ്ണിൽ വിജയ് കാഴ്ചവെച്ചത്.
2024-ൽ പാർട്ടി രൂപീകരിച്ച വിജയ്, രണ്ട് വർഷത്തിനുള്ളിൽ നടന്ന ആദ്യ നിയമസഭാ തിരഞ്ഞെടുപ്പിൽ 233 സീറ്റുകളിൽ ഒറ്റയ്ക്ക് മത്സരിച്ചു. ഇതിൽ 108 സീറ്റുകളിൽ വിജയിച്ച് ടി.വി.കെ ഏറ്റവും വലിയ ഒറ്റകക്ഷിയായി മാറി. പെരമ്പൂരിൽ 53,715 വോട്ടുകളുടെയും തൃച്ചി ഈസ്റ്റിൽ 27,416 വോട്ടുകളുടെയും വമ്പിച്ച ഭൂരിപക്ഷത്തിലാണ് വിജയ് വിജയിച്ചത്.
തമിഴ്നാട്ടിലെ വോട്ട് വിഹിതത്തിൽ 34.92 ശതമാനം വോട്ടുകൾ നേടി ടി.വി.കെ ഒന്നാം സ്ഥാനത്തെത്തി. ഭരണകക്ഷിയായിരുന്ന ഡി.എം.കെ 24.19 ശതമാനം വോട്ടുകളുമായി രണ്ടാം സ്ഥാനത്തേക്കും, എ.ഡി.എം.കെ 21.21 ശതമാനം വോട്ടുകളുമായി മൂന്നാം സ്ഥാനത്തേക്കും പിന്തള്ളപ്പെട്ടു. കേവല ഭൂരിപക്ഷത്തിന് ആവശ്യമായ 118 സീറ്റുകൾ ലഭിച്ചില്ലെങ്കിലും, മറ്റ് പാർട്ടികളുടെ പിന്തുണ ഉറപ്പായതോടെ തമിഴ്നാടിന്റെ പുതിയ മുഖ്യമന്ത്രിയായി വിജയ് ഉടൻ സത്യപ്രതിജ്ഞ ചെയ്യും.
Summary: Actor Vijay’s Tamilzhaga Vettri Kazhagam (TVK) has emerged as the single largest party in the Tamil Nadu Assembly elections, securing 34.92% of the total votes. Following in the footsteps of legends like MGR and NTR, Vijay won 108 seats out of the 233 contested. Although falling short of an absolute majority, Vijay is set to become the Chief Minister with the support of other parties, pushing DMK and AIADMK to the second and third positions respectively.
