18 മണിക്കൂര്‍ നീണ്ട രക്ഷാപ്രവർത്തനത്തിനൊടുവിൽ കുഴല്‍ക്കിണറിലകപ്പെട്ട രണ്ടുവയസുകാരനെ പുറത്തെത്തിച്ചു
Apr 4, 2024, 14:29 IST
ബംഗളൂരു: 18 മണിക്കൂര്‍ നീണ്ട പരിശ്രമത്തിനൊടുവിൽ കര്‍ണാടകയില്‍ കുഴല്‍ക്കിണറില്‍ വീണ രണ്ടുവയസുകാരനെ പുറത്തെത്തിച്ചു. കുട്ടിയെ പുറത്തെടുത്തത് 20 അടി താഴ്ചയിൽ നിന്നാണ്. രക്ഷിച്ച കുട്ടിയുടെ ആരോഗ്യനിലയെക്കുറിച്ചുള്ള കൂടുതൽ വിവരങ്ങൾ ലഭ്യമല്ല. അപകടം സംഭവിച്ചത് ബുധനാഴ്ച വൈകീട്ട് വിജയപുര ജില്ലയിലെ ഇൻഡി താലൂക്കിൽ ഉൾപ്പെടുന്ന ലചായൻ ഗ്രാമത്തിലാണ്. കുട്ടി വീടിന് സമീപം കളിക്കുന്നതിനിടയിൽ കിണറ്റിൽ വീഴുകയും ശബ്ദം കേട്ട പരിസരവാസി നാട്ടുകാരെ വിവരമറിയിക്കുകയുമായിരുന്നു. ഇതേതുടർന്ന് രക്ഷാപ്രവർത്തനം നടത്താനായി പോലീസ്, റവന്യൂ വകുപ്പ്, പഞ്ചായത്ത്, ഫയ‍ർഫോഴ്സ് തുടങ്ങി വിവിധ വകുപ്പുകളിലെ ഉദ്യോഗസ്ഥർ എത്തുകയും സംയുക്തമായി പ്രവർത്തിക്കുകയും ചെയ്തു.