തുഗ്ലഖാബാദ്: തെക്കൻ ഡൽഹിയിലെ തുഗ്ലഖാബാദിൽ മൂന്ന് പേരുടെ മരണത്തിനിടയാക്കിയ തീപിടിത്തം തീപിടിത്തം ആസൂത്രിത കൊലപാതകമെന്ന് പോലീസ്. സംഭവത്തിൽ 17 വയസ്സുള്ള പെൺകുട്ടി ഉൾപ്പെടെ നാല് പേരെ പോലീസ് അറസ്റ്റ് ചെയ്തു (Tughlakabad Fire Was Arson Conspiracy). ജൂൺ 12-ന് പുലർച്ചെ 2.24-ഓടെ ഗോവിന്ദപുരി പോലീസ് സ്റ്റേഷൻ പരിധിയിലെ തുഗ്ലഖാബാദ് എക്സ്റ്റൻഷനിലുള്ള അഞ്ചുനില കെട്ടിടത്തിലായിരുന്നു സംഭവം. പ്രാഥമിക അന്വേഷണത്തിൽ അപകടമെന്ന് കരുതിയ സംഭവം സി.സി.ടി.വി ദൃശ്യങ്ങൾ പരിശോധിച്ചതോടെയാണ് കൊലപാതകമെന്ന് തെളിഞ്ഞത്.
കെട്ടിടത്തിനുള്ളിലേക്ക് മുഖം മറച്ച് ഒരാൾ പ്രവേശിക്കുന്നതും ഉടൻ തന്നെ പുറത്തിറങ്ങുന്നതും സി.സി.ടി.വിയിൽ കണ്ടതോടെയാണ് അന്വേഷണം വഴിതിരിഞ്ഞത്. തുടർന്ന് നടത്തിയ പരിശോധനയിൽ നവ്ജീവൻ ക്യാമ്പിലെ 17 വയസ്സുകാരിയെ പിടികൂടുകയായിരുന്നു. അഞ്ചാം നിലയിൽ താമസിക്കുന്ന ദീപക് എന്ന വ്യക്തിയുടെ സ്കൂട്ടറിന് തീവെക്കാൻ ആവശ്യപ്പെട്ടത് ഗിരിനഗർ സ്വദേശിനിയായ സരിത (27) ആണെന്ന് പെൺകുട്ടി മൊഴി നൽകി. ഇതിനായി പെട്രോളും തീപ്പെട്ടിയും നൽകിയത് സരിതയായിരുന്നു. തുടർന്ന് സരിതയെയും പോലീസ് അറസ്റ്റ് ചെയ്തു. സരിത നൽകിയ വിവരമനുസരിച്ചാണ് സംഭവത്തിന് പിന്നിൽ പ്രവർത്തിച്ച നവ്ജീവൻ ക്യാമ്പ് സ്വദേശികളായ നിരംജൻ (33), സഹോദരൻ രാജ്കുമാർ (27) എന്നിവരെ പോലീസ് പിടികൂടിയത്. ദീപകുമായുള്ള സാമ്പത്തിക തർക്കം തീർക്കാൻ ഇവർ ആസൂത്രണം ചെയ്ത ഗൂഢാലോചനയാണ് ദുരന്തത്തിൽ കലാശിച്ചത്.
ഗ്രൗണ്ട് ഫ്ലോറിലെ പാർക്കിംഗ് ഏരിയയിൽ പാർക്ക് ചെയ്തിരുന്ന സ്കൂട്ടറിന് തീവെച്ചതോടെ തീയും പുകയും കെട്ടിടത്തിലുടനീളം അതിവേഗം പടരുകയായിരുന്നു. ഉറക്കത്തിലായിരുന്ന താമസക്കാർക്ക് പുറത്തിറങ്ങാൻ കഴിയാതെ ശ്വാസംമുട്ടി മരിക്കുകയായിരുന്നു. സുശീല ദേവി (70), പങ്കജ് പാണ്ഡെ (28), സോണി കുമാരി എന്നിവരാണ് മരിച്ചത്. ഗുരുതരമായി പരിക്കേറ്റവർ എയിംസ് ട്രോമ സെന്ററിലും സഫ്ദർജംഗ് ആശുപത്രിയിലും ചികിത്സയിലാണ്. സംഭവത്തിൽ ഭാരതീയ ന്യായ സംഹിതയിലെ ക്രിമിനൽ ഗൂഢാലോചന, നരഹത്യ, കൊലപാതകശ്രമം, തീവെപ്പിലൂടെ നാശനഷ്ടം വരുത്തൽ തുടങ്ങിയ ഗുരുതരമായ വകുപ്പുകൾ ചുമത്തിയാണ് പോലീസ് കേസെടുത്തിരിക്കുന്നത്.
Summary: The fatal fire at a residential building in Tughlakabad, South Delhi, which claimed three lives, has been identified as a deliberate act of arson resulting from a long-standing financial dispute between cousins. A 17-year-old girl confessed to setting fire to a scooter, acting on the instigation of an accused named Sarita, who provided the materials. Police have arrested three adults and detained the minor, invoking severe charges including criminal conspiracy and culpable homicide.
