ബ്യൂണസ് അയേഴ്സ്: അർജന്റീനയുടെ ഇതിഹാസ പ്രതിരോധതാരമായ നിക്കോളാസ് ഒട്ടമെൻഡി അന്താരാഷ്ട്ര ഫുട്ബോളിൽ നിന്ന് വിരമിക്കൽ പ്രഖ്യാപിച്ചു. 17 വർഷം നീണ്ട ദേശീയ ടീം കരിയറിന് വിരാമമിടുന്ന താരം, 2022 ഫിഫ ലോകകപ്പും രണ്ട് കോപ്പ അമേരിക്ക കിരീടങ്ങളും ഉൾപ്പെടെ അർജന്റീനയുടെ ഏറ്റവും വിജയകരമായ തലമുറയിലെ നിർണായക അംഗമായിരുന്നു. (Nicolas Otamendi Retirement)
38-കാരനായ സെന്റർ ബാക്ക് അർജന്റീനയ്ക്കായി 139 മത്സരങ്ങളിൽ കളിച്ചു. അമേരിക്കയിൽ നടന്ന 2026 ഫിഫ ലോകകപ്പിൽ ഫൈനൽ വരെയെത്തിയ അർജന്റീന ടീമിലും അദ്ദേഹം അംഗമായിരുന്നു. എന്നാൽ ഫൈനലിൽ സ്പെയിനിനോട് 1-0ന് പരാജയപ്പെട്ട മത്സരമാണ് ദേശീയ ടീമിനായുള്ള ഒട്ടമെൻഡിയുടെ അവസാന മത്സരം.
വിരമിക്കൽ പ്രഖ്യാപിച്ച് ഇൻസ്റ്റഗ്രാമിൽ പങ്കുവെച്ച കുറിപ്പിൽ, തന്റെ കരിയറിലെ ഏറ്റവും ബുദ്ധിമുട്ടുള്ള വാക്കുകളാണ് ഇപ്പോൾ എഴുതുന്നതെന്ന് ഒട്ടമെൻഡി പറഞ്ഞു.
“എന്റെ കരിയറിലെ ഏറ്റവും പ്രയാസമേറിയ വാക്കുകളാണ് ഇന്ന് എഴുതുന്നത്. വിധിയുടെ തീരുമാനമെന്ന പോലെ, എന്റെ അവസാന മത്സരം ഒരു ലോകകപ്പ് ഫൈനലായിരുന്നു. ഞങ്ങൾ ആഗ്രഹിച്ച ഫലമല്ല ലഭിച്ചത്. എങ്കിലും ലോക ചാമ്പ്യനായെന്ന സ്വപ്നം സാക്ഷാത്കരിക്കാൻ അവസരം നൽകിയ അർജന്റീനയ്ക്ക് നന്ദി,” എന്നാണ് അദ്ദേഹം കുറിച്ചത്.
2026 ലോകകപ്പിൽ കിരീടം നിലനിർത്താനിറങ്ങിയ അർജന്റീനയുടെ യാത്ര ഫൈനലിലാണ് അവസാനിച്ചത്. നോക്കൗട്ട് ഘട്ടത്തിൽ ഈജിപ്തിനെതിരെയും സെമിഫൈനലിൽ ഇംഗ്ലണ്ടിനെതിരെയും അതിശയകരമായ തിരിച്ചുവരവുകളിലൂടെ വിജയം നേടിയ അർജന്റീനയെ, ഫൈനലിൽ ലൂയിസ് ഡി ലാ ഫുവെന്റെ നേതൃത്വത്തിലുള്ള സ്പെയിൻ 1-0ന് കീഴടക്കി കിരീടം സ്വന്തമാക്കുകയായിരുന്നു.
യൂറോപ്യൻ ക്ലബ് ഫുട്ബോളിലും ശ്രദ്ധേയമായ കരിയറാണ് ഒട്ടമെൻഡിക്കുണ്ടായിരുന്നത്. പോർട്ടോ, വലൻസിയ, മാഞ്ചസ്റ്റർ സിറ്റി, ബെൻഫിക്ക എന്നീ ക്ലബുകൾക്കായി കളിച്ച ശേഷം അടുത്തിടെയാണ് അദ്ദേഹം അർജന്റീനൻ വമ്പന്മാരായ റിവർ പ്ലേറ്റിലേക്ക് മടങ്ങിയത്.
നാല് ഫിഫ ലോകകപ്പുകളിൽ അർജന്റീനയെ പ്രതിനിധീകരിച്ച ഒട്ടമെൻഡി, രാജ്യത്തിന്റെ ഏറ്റവും മികച്ച പ്രതിരോധ താരങ്ങളിൽ ഒരാളായാണ് ഫുട്ബോൾ ചരിത്രത്തിൽ ഇടംപിടിക്കുന്നത്. ലോകകപ്പ്, കോപ്പ അമേരിക്ക എന്നീ പ്രധാന കിരീടങ്ങൾ സ്വന്തമാക്കിയ അദ്ദേഹത്തിന്റെ അന്താരാഷ്ട്ര കരിയർ അർജന്റീന ഫുട്ബോളിലെ ഒരു സുവർണ അധ്യായമായാണ് വിലയിരുത്തപ്പെടുന്നത്.
Summary: Argentina defender Nicolas Otamendi has announced his retirement from international football after a remarkable 17-year career. The World Cup-winning centre-back made 139 appearances for Argentina and ends his national team journey after the 2026 FIFA World Cup final.
