കൊൽക്കത്ത: പശ്ചിമ ബംഗാൾ രാഷ്ട്രീയത്തിൽ വൻ ഭൂകമ്പം സൃഷ്ടിച്ചുകൊണ്ട് ഭരണകക്ഷിയായിരുന്ന തൃണമൂൽ കോൺഗ്രസ് (ടി.എം.സി) പിളർപ്പിലേക്ക് (TMC split). പാർട്ടിയിൽ നിന്നും അടുത്തിടെ പുറത്താക്കപ്പെട്ട മുതിർന്ന നേതാവും എം.എൽ.എയുമായ ഋതബ്രത ബാനർജി പശ്ചിമ ബംഗാൾ നിയമസഭയിലെ പുതിയ പ്രതിപക്ഷ നേതാവാകും. തനിക്ക് അറുപതോളം ടി.എം.സി എം.എൽ.എമാരുടെ ശക്തമായ പിന്തുണയുണ്ടെന്ന് വാർത്താസമ്മേളനത്തിൽ വ്യക്തമാക്കിയ ഋതബ്രത ബാനർജിയുടെ അവകാശവാദം നിയമസഭാ സ്പീക്കർ രതീന്ദ്ര ബോസ് അംഗീകരിക്കുകയും ചെയ്തു.
പാർട്ടി ഔദ്യോഗികമായി മുതിർന്ന നേതാവ് ശോഭന്ദേബ് ചതോപാധ്യായയെ പ്രതിപക്ഷ നേതാവായി പ്രഖ്യാപിച്ചതിന് പിന്നാലെയാണ് ടി.എം.സിയിൽ വിമത വിഭാഗം പരസ്യമായ പടയൊരുക്കം ആരംഭിച്ചത്. പ്രതിപക്ഷ നേതാവിനെ തിരഞ്ഞെടുക്കുന്നതിൽ പാർട്ടി നേതൃത്വം കൃത്യമായ നടപടിക്രമങ്ങൾ പാലിച്ചില്ലെന്നും പലരുടെയും ഒപ്പുകൾ വ്യാജമായി ചമച്ചതാണെന്നും വിമതർ ആരോപിക്കുന്നു. ജാവേദ് ഖാൻ, സന്ദീപൻ സാഹ, സബീന യാസ്മിൻ, ഷിയുലി സാഹ എന്നിവർ പ്രതിപക്ഷ ഉപനേതാക്കളാകും.
മഹാരാഷ്ട്ര മാതൃകയിൽ മറ്റൊരു ഔദ്യോഗിക ടി.എം.സി രൂപീകരിക്കാനുള്ള നീക്കത്തിലാണ് വിമതർ. എന്നാൽ തങ്ങൾ മമതാ ബാനർജിക്കെതിരല്ലെന്നും, അവരെ പാർട്ടിയുടെ ഉപദേശകയായി തുടരാൻ ക്ഷണിക്കുകയാണെന്നും വ്യക്തമാക്കിയ വിമതർ, പാർട്ടിയുടെ സമീപകാല തിരഞ്ഞെടുപ്പ് പരാജയങ്ങൾക്ക് കാരണം മമതയുടെ അനന്തരവനും ജനറൽ സെക്രട്ടറിയുമായ അഭിഷേക് ബാനർജിയാണെന്ന് കടുത്ത ഭാഷയിൽ വിമർശിച്ചു.
അതേസമയം, പാർട്ടിയെ ഉലയ്ക്കുന്ന പ്രതിസന്ധികൾക്കിടയിൽ തൃണമൂൽ കോൺഗ്രസ് നേതാവ് അഭിഷേക് ബാനർജിക്ക് എൻഫോഴ്സ്മെന്റ് ഡയറക്ടറേറ്റ് (ഇ.ഡി) സമൻസ് അയച്ചു. ബംഗാളിലെ അധ്യാപക നിയമനവുമായി ബന്ധപ്പെട്ട കള്ളപ്പണ ഇടപാടിൽ ചോദ്യം ചെയ്യലിനായി ഈ മാസം 15-ന് ഹാജരാകാനാണ് നിർദ്ദേശം. ഇ.ഡി ഉദ്യോഗസ്ഥർ നേരിട്ട് വീട്ടിലെത്തിയാണ് സമൻസ് കൈമാറിയത്.
പാർട്ടി രൂപീകരണത്തിന് ശേഷം ഇതുവരെ നേരിട്ടിട്ടില്ലാത്ത അതിരൂക്ഷമായ ആഭ്യന്തര കലഹത്തിലൂടെയാണ് തൃണമൂൽ കോൺഗ്രസ് ഇപ്പോൾ കടന്നുപോകുന്നത്. വിമത നീക്കം ശക്തമായതോടെ കീഴ്ഘടകങ്ങൾ മുതൽ മേൽക്കമ്മിറ്റികൾ വരെയും എല്ലാ പോഷക സംഘടനകളെയും മമതാ ബാനർജി അടിയന്തരമായി പിരിച്ചുവിട്ടു. സംഘടനയുടെ പുനഃസംഘടനയുടെ ഭാഗമായാണ് ഇതെന്നാണ് ഔദ്യോഗിക വിശദീകരണമെങ്കിലും, മമതയോട് പൂർണ്ണ കൂറുള്ളവരെ മാത്രം നേതൃസ്ഥാനങ്ങളിൽ എത്തിക്കാനാണ് ഈ നീക്കം. തിരഞ്ഞെടുപ്പ് പരാജയത്തെക്കുറിച്ച് പാർട്ടി ആത്മപരിശോധന നടത്തുമെന്നും വരും ദിവസങ്ങളിൽ കടുത്ത തീരുമാനങ്ങളിലേക്ക് നീങ്ങുമെന്നും പാർട്ടി വൃത്തങ്ങൾ അറിയിച്ചു.
Story Summary: The Trinamool Congress (TMC) in West Bengal is on the verge of a major split as expelled MLA Ritabrata Banerjee claimed the support of 60 rebel MLAs to become the new Leader of the Opposition. Amidst this political turmoil, TMC has dissolved all its organizational committees, and national general secretary Abhishek Banerjee has been summoned by the ED in connection with a money laundering case.
