മാൻഹോളിലൂടെയുള്ള വിഷവാതകം ശ്വസിച്ച് ഒരു കുടുംബത്തിലെ മൂന്നുപേർ മരിച്ചു
Jun 11, 2024, 14:35 IST
പോണ്ടിച്ചേരി: മാന്‍ ഹോളിലൂടെയുള്ള വിഷവാതകം ശ്വസിച്ചു ഒരു കുടുംബത്തിലെ മൂന്നുപേർ മരിച്ചു. പുതുച്ചേരിയിലെ റെഡ്യാര്‍പാളയത്ത് ആണ് സംഭവം. മരിച്ചത് ഒരു പെണ്‍കുട്ടിയും രണ്ട് സ്ത്രീകളുമാണ്. രണ്ടുപേര്‍ കുഴഞ്ഞു വീഴുകയുമുണ്ടായി. വിഷവാതകം പുറത്തെത്തിയത് വീടിനുള്ളിലെ ശുചിമുറിയിലൂടെയാണ്. മരണകാരണം ശുചിമുറിയിലേക്ക് തെരുവിലെ ഭൂഗര്‍ഭ അഴുക്കുചാലില്‍ നിന്നുള്ള വിഷവാതകം പടർന്നതാണെന്നാണ് പ്രാഥമിക വിവരം. ആദ്യം അപകടമുണ്ടായത് റെഡ്യാര്‍പാളയം സ്വദേശിനിയായ സെന്താമരൈ(72)ക്കാണ്. ഇവർ രാവിലെ ശുചിമുറിയിൽ കയറുകയും കുഴഞ്ഞുവീഴുകയുമായിരുന്നു. ഇവരെ കാണാത്തതിനെ തുടർന്ന് ശുചിമുറിയിലേക്കെത്തിയ മകള്‍ കാമാക്ഷിയും വിഷവാതകം മൂലം ബോധരഹിതയായി. കാമാക്ഷിയുടെ മകള്‍ പാക്യലക്ഷ്മി(15) ഇരുവരെയും അന്വേഷിച്ചെത്തുകയും അപകടത്തിൽപ്പെടുകയുമായിരുന്നു. ഉടൻ തന്നെ ആശുപത്രിയിലെത്തിച്ചെങ്കിലും മരണം സംഭവിച്ചു.