ചെന്നൈ: മുഖ്യമന്ത്രി സി. ജോസഫ് വിജയിയുടെ നേതൃത്വത്തിലുള്ള പുതിയ സർക്കാർ അധികാരമേറ്റതിന് ശേഷമുള്ള ആദ്യ നിയമസഭാ സമ്മേളനത്തിൽ മുല്ലപ്പെരിയാർ വിഷയത്തിൽ തമിഴ്നാടിന്റെ കർക്കശ നിലപാട് ആവർത്തിച്ചു. മുല്ലപ്പെരിയാറിൽ പുതിയ ഡാം നിർമ്മിക്കാനുള്ള കേരളത്തിന്റെ നീക്കങ്ങളെ ശക്തമായി എതിർക്കുമെന്നും, നിലവിലുള്ള ഡാമിന്റെ സുരക്ഷ ഉറപ്പാക്കുമെന്നും സർക്കാർ വ്യക്തമാക്കി. ഗവർണർ രാജേന്ദ്ര വിശ്വനാഥ് അർലേക്കർ നടത്തിയ നയപ്രഖ്യാപന പ്രസംഗത്തിലാണ് ഇക്കാര്യം വ്യക്തമാക്കിയത്.(Tamil Nadu Government Opposes New Mullaperiyar Dam In Policy Address)
ഗവർണറുടെ പ്രസംഗം സർക്കാർ തയ്യാറാക്കിയ രേഖയ്ക്ക് അനുസൃതമായിരുന്നു എന്നത് ശ്രദ്ധേയമായി. സംസ്ഥാനത്തിന്റെ അവകാശങ്ങളും കേന്ദ്രവുമായുള്ള തർക്കങ്ങളും നയപ്രഖ്യാപനത്തിൽ നിഴലിച്ചു നിന്നു. സംസ്ഥാനത്തിനുള്ള കേന്ദ്രഫണ്ടുകൾ അനുവദിക്കുന്നതിൽ കേന്ദ്രം വിവേചനപരമായ സമീപനമാണ് സ്വീകരിക്കുന്നതെന്ന് സർക്കാർ ആരോപിച്ചു. ഇതിനെതിരെ വിശദമായ റിപ്പോർട്ട് പ്രസിദ്ധീകരിക്കും.
മുൻ സർക്കാരിന്റെ കാലത്തെ “സാമ്പത്തിക അച്ചടക്കമില്ലായ്മ” ചൂണ്ടിക്കാട്ടി സർക്കാർ അടുത്തിടെ പുറത്തിറക്കിയ വൈറ്റ് പേപ്പറിനെക്കുറിച്ച് ഗവർണർ പരാമർശിച്ചു. തമിഴ്നാട്ടിലെ ഓരോ വ്യക്തിയുടെയും തലയിൽ ഒരു ലക്ഷം രൂപയിലധികം കടബാധ്യതയുണ്ടെന്ന് അദ്ദേഹം ചൂണ്ടിക്കാട്ടി. ത്രിഭാഷാ പദ്ധതിയെയും ദേശീയ വിദ്യാഭ്യാസ നയത്തെയും തമിഴ്നാട് ശക്തമായി എതിർത്തു. വിദ്യാഭ്യാസത്തെ കൺകറന്റ് ലിസ്റ്റിൽ നിന്ന് സംസ്ഥാന ലിസ്റ്റിലേക്ക് മാറ്റണമെന്നും സർക്കാർ ആവശ്യപ്പെട്ടു.
സംസ്ഥാനത്ത് ജാതി അടിസ്ഥാനത്തിലുള്ള സെൻസസ് നടത്തുമെന്ന് സർക്കാർ പ്രഖ്യാപിച്ചു. ജലാശയങ്ങളിൽ നിന്ന് ചെളി നീക്കം ചെയ്യാൻ കർഷകർക്ക് സൗജന്യമായി അനുമതി നൽകുന്നത് തുടരുമെന്നും സർക്കാർ അറിയിച്ചു. മുൻ ഗവർണറും അന്നത്തെ ഡിഎംകെ സർക്കാരും തമ്മിലുണ്ടായിരുന്ന തർക്കങ്ങളുടെ പശ്ചാത്തലത്തിൽ, ഇത്തവണ ഗവർണർ സർക്കാർ തയ്യാറാക്കിയ പ്രസംഗം പൂർണ്ണമായി വായിച്ചു എന്നത് രാഷ്ട്രീയമായി വലിയ മാറ്റമായാണ് വിലയിരുത്തപ്പെടുന്നത്. മുഖ്യമന്ത്രി സി. ജോസഫ് വിജയ്, പ്രതിപക്ഷ നേതാവ് ഉദയനിധി സ്റ്റാലിൻ തുടങ്ങിയവർ സഭയിൽ സന്നിഹിതരായിരുന്നു.
Story Summary
The C. Joseph Vijay-led Tamil Nadu government, in its first legislative policy address, reaffirmed its opposition to a new dam at Mullaperiyar and criticized the Centre’s “discriminatory” approach regarding financial devolution. Governor Rajendra Vishwanath Arlekar also highlighted the state’s commitment to social justice, caste-based census, and opposition to the NEP, while releasing a White Paper on the previous administration’s fiscal mismanagement.
