കർണാടകയിലെ പരാജയം മറച്ചുവെക്കാനുള്ള തന്ത്രം; 2000 നോട്ട് പിന്‍വലിച്ചതില്‍ വിമർശനവുമായി സ്റ്റാലിൻ
Sat, 20 May 2023
ചെന്നൈ: രണ്ടായിരം രൂപയുടെ കറൻസി പിന്‍വലിച്ചതിന് പിന്നാലെ കേന്ദ്ര സർക്കാരിനെതിരേ രൂക്ഷ വിമർശനവുമായി തമിഴ്നാട് മുഖ്യമന്ത്രി എം.കെ. സ്റ്റാലിൻ. കർണാടകയിൽ ബി.ജെ.പിക്കേറ്റ കനത്ത പരാജയം മറച്ചുവെക്കാനുള്ള തന്ത്രമാണ് കേന്ദ്രത്തിന്റേതെന്ന് സ്റ്റാലിൻ ട്വീറ്റ് ചെയ്തു.
'500 സംശയങ്ങൾ, 1000 നിഗൂഢതകൾ, 2000 അബദ്ധങ്ങൾ. കർണാടകയിലെ കനത്ത പരാജയം മറച്ചുവെക്കാനുള്ള വിദ്യ' - സ്റ്റാലിൻ ട്വിറ്ററിൽ കുറിച്ചു.
കഴിഞ്ഞ ദിവസം രാത്രിയിലായിരുന്നു 2000 രൂപാ നോട്ട് പിൻവലിച്ചു കൊണ്ടുള്ള ഉത്തരവ് ആർ.ബി.ഐ. പുറപ്പെടുവിച്ചത്. 2000 രൂപയുടെ നോട്ടുകൾ സെപ്റ്റംബര്‍ 30 വരെ മാറ്റിയെടുക്കാമെന്ന് ആര്‍.ബി.ഐ വ്യക്തമാക്കിയിട്ടുണ്ട്. അതുവരെ നോട്ടുകളുടെ നിയമപ്രാബല്യം തുടരും. നിലവില്‍ കൈവശമുള്ള 2000-ത്തിന്റെ നോട്ടുകള്‍ ഉപയോഗിക്കുന്നതിന് തടസ്സമില്ലെന്നും അധികൃതര്‍ അറിയിച്ചു.