പശ്ചിമ ബംഗാൾ രാഷ്ട്രീയത്തിൽ പുതിയ യുഗത്തിന് തുടക്കം കുറിച്ചുകൊണ്ട് ബിജെപി നിയമസഭാ കക്ഷി നേതാവ് സുവേന്ദു അധികാരി പശ്ചിമ ബംഗാൾ മുഖ്യമന്ത്രിയായി സത്യപ്രതിജ്ഞ ചെയ്തു. ശനിയാഴ്ച കൊൽക്കത്തയിലെ ബ്രിഗേഡ് പരേഡ് ഗ്രൗണ്ടിൽ നടന്ന പ്രൗഢഗംഭീരമായ ചടങ്ങിൽ ഗവർണർ ആർ.എൻ. രവി സത്യവാചകം ചൊല്ലിക്കൊടുത്തു. ബംഗാളിലെ ആദ്യ ബിജെപി സർക്കാരാണിത്. (Suvendu Adhikari oath ceremony)
ബ്രിഗേഡ് പരേഡ് ഗ്രൗണ്ടിൽ നടന്ന ചടങ്ങിൽ പ്രധാനമന്ത്രി നരേന്ദ്ര മോദി, കേന്ദ്രമന്ത്രിമാർ, വിവിധ എൻഡിഎ സംസ്ഥാനങ്ങളിലെ മുഖ്യമന്ത്രിമാർ എന്നിവർ പങ്കെടുത്തു. 294 അംഗ നിയമസഭയിൽ 207 സീറ്റുകൾ നേടിയാണ് ബിജെപി അധികാരത്തിലെത്തിയത്. ഇതോടെ മമത ബാനർജിയുടെ പതിനഞ്ച് വർഷം നീണ്ട ഭരണത്തിന് അന്ത്യമായി.
98 വയസ്സുള്ള ബിജെപി നേതാവ് മഖൻലാൽ സർക്കാരിന്റെ പാദങ്ങൾ തൊട്ട് വന്ദിച്ച പ്രധാനമന്ത്രി മോദിയുടെ പ്രവർത്തനം ചടങ്ങിലെ വൈകാരിക നിമിഷമായി. ശ്യാമപ്രസാദ് മുഖർജിക്കൊപ്പം 1952-ൽ കശ്മീർ പ്രക്ഷോഭത്തിൽ പങ്കെടുത്ത നേതാവാണ് മഖൻലാൽ. പുരുളിയ ചൗ നർത്തകരും നാടൻ കലാകാരന്മാരും അവതരിപ്പിച്ച കലാപരിപാടികൾ ചടങ്ങിന് മാറ്റുകൂട്ടി. പൊതുജനങ്ങൾക്ക് ‘ത്സാൽമുറി’ വിതരണം ചെയ്യാനായി പ്രത്യേക സ്റ്റാളുകളും ഗ്രൗണ്ടിൽ ഒരുക്കിയിരുന്നു.
“സോനാർ ബംഗ്ല” (സുവർണ്ണ ബംഗാൾ) എന്ന ലക്ഷ്യത്തോടെയാണ് പുതിയ സർക്കാർ മുന്നോട്ട് പോകുന്നതെന്ന് സത്യപ്രതിജ്ഞയ്ക്ക് മുന്നോടിയായി സുവേന്ദു അധികാരി പറഞ്ഞു. ഉത്തരാഖണ്ഡ് മുഖ്യമന്ത്രി പുഷ്കർ സിംഗ് ധാമി, ജയന്ത് ചൗധരി, അമിത് ഷാ തുടങ്ങിയ പ്രമുഖ നേതാക്കളും ചടങ്ങിന് സാക്ഷ്യം വഹിക്കാൻ കൊൽക്കത്തയിലെത്തിയിരുന്നു.
Summary: Suvendu Adhikari has been sworn in as the first BJP Chief Minister of West Bengal on Saturday, May 9, 2026. The ceremony took place at Kolkata’s Brigade Parade Ground in the presence of PM Narendra Modi. BJP ended Mamata Banerjee’s 15-year rule by winning 207 seats in the assembly elections.
