കപ്പലിടിച്ച് മീൻപിടിത്ത ബോട്ട് മുങ്ങിയ സംഭവത്തെത്തുടർന്ന് വിഴിഞ്ഞം കടലിൽ പിടിച്ചിട്ടിരിക്കുന്ന ‘സോളിസ്’ എന്ന കപ്പൽ മാറ്റാൻ നീക്കം. കാലവർഷം ആരംഭിക്കുന്നതോടെ വിഴിഞ്ഞത്തെ കടൽ പ്രക്ഷുബ്ധമാകാൻ സാധ്യതയുള്ളതിനാലാണ് കപ്പലിനെ കൊല്ലം തുറമുഖത്തേക്കോ കൊച്ചിയിലേക്കോ മാറ്റാൻ അധികൃതർ ആലോചിക്കുന്നത് (Vizhinjam ship Solis move). ഡയറക്ടർ ജനറൽ ഓഫ് ഷിപ്പിംഗിന്റെ നിർദ്ദേശത്തെത്തുടർന്ന് കപ്പൽ ഏജൻസി കൊല്ലം തുറമുഖ അധികൃതരുമായി ചർച്ചകൾ തുടങ്ങിയിട്ടുണ്ട്.
കൊല്ലം തുറമുഖത്തുനിന്ന് അനുമതി ലഭിച്ചാലുടൻ കപ്പൽ വിഴിഞ്ഞത്തുനിന്ന് കൊണ്ടുപോകും. നിലവിൽ വിദേശ കപ്പൽ വിഴിഞ്ഞത്ത് നങ്കൂരമിട്ടതിലൂടെ വാടക ഇനത്തിൽ ഏകദേശം 25 ലക്ഷം രൂപയോളം വരുമാനം ലഭിച്ചിട്ടുണ്ട്. രണ്ട് ദിവസം മുൻപ് കപ്പലിൽ ബങ്കറിംഗും (ഇന്ധനം നിറയ്ക്കൽ) നടത്തിയിരുന്നു. കപ്പൽ തുറമുഖം വിട്ടുപോകരുതെന്ന കൊച്ചി മർക്കന്റൈൽ മറൈൻ വകുപ്പിന്റെ ഉത്തരവ് നിലനിൽക്കുന്നതിനാലാണ് കപ്പലിനെ മറ്റൊരു സുരക്ഷിത തുറമുഖത്തേക്ക് മാറ്റുന്നത്.
കഴിഞ്ഞ മാർച്ച് ഏഴിന് കന്യാകുമാരിക്ക് സമീപം കടലിൽ വെച്ചാണ് സോളിസ് കപ്പൽ കൊല്ലം സ്വദേശിയുടെ ‘സെന്റ് ജോസഫ്’ എന്ന ബോട്ടിലിടിക്കുന്നത്. അപകടത്തിൽ ബോട്ട് പൂർണ്ണമായും മുങ്ങുകയും അതിലുണ്ടായിരുന്ന 11 പേരിൽ കൊൽക്കത്ത സ്വദേശികളായ ലഖാൻ ദാസ്, മകൻ ബാദൽ എന്നിവരെ കടലിൽ കാണാതാവുകയും ചെയ്തിരുന്നു. പരിക്കുകളോടെ രക്ഷപ്പെട്ട ഒൻപത് പേരിൽ തമിഴ്നാട്, കൊൽക്കത്ത സ്വദേശികളാണുള്ളത്.
S: The ship ‘Solis,’ detained off Vizhinjam coast following a collision with a fishing boat, is likely to be moved to Kollam or Kochi ports due to the upcoming monsoon. Following instructions from the Director General of Shipping, talks are underway with Kollam port authorities. The ship was involved in a March 7 accident near Kanyakumari, where two fishermen went missing and nine others were injured.
