എൻസിപി അധ്യക്ഷസ്ഥാനം രാജിവച്ച തീരുമാനം ശരത് പവാർ പിൻവലിച്ചേക്കും; തീരുമാനം രണ്ടോ മൂന്നോ ദിവസത്തിനകം അറിയിക്കാമെന്ന് അജിത് പവാർ
May 2, 2023, 20:09 IST

മുംബൈ: എൻസിപി അധ്യക്ഷസ്ഥാനം രാജിവച്ച തീരുമാനം ശരത് പവാർ പിൻവലിച്ചേക്കും. രണ്ടോ മൂന്നോ ദിവസത്തിനകം പവാർ തീരുമാനമറിയിക്കുമെന്ന് എൻസിപി നേതാവ് അജിത് പവാർ പറഞ്ഞു. ശരത് പവാർ തീരുമാനം പിൻവലിക്കണമെന്ന് ആവശ്യപ്പെട്ട് പ്രതിഷേധിക്കുന്ന പാർട്ടി പ്രവർത്തകരോടായാണ് ശരത് പവാറിന്റെ അനന്തരവൻ കൂടിയായ അജിത് ഇക്കാര്യം അറിയിച്ചത്. മുതിർന്ന എൻസിപി നേതാക്കൾ ശരത് പവാറിനെ കണ്ട് പാർട്ടി പ്രവർത്തകരുടെ വികാരം അറിയിച്ചതോടെ പ്രവർത്തകരുടെ ആവശ്യങ്ങൾ അദ്ദേഹം പരിഗണിക്കുമെന്നും അജിത് പറഞ്ഞു.
അജിത് പവാർ എൻസിപി പിടിക്കാൻ നീക്കം നടത്തുന്നതായും ബിജെപിയുമായി സഖ്യത്തിന് ശ്രമിക്കുന്നതായുമുള്ള റിപ്പോർട്ടുകൾക്ക് പിന്നാലെയാണ് ശരത് പവാർ നടകീയ പ്രഖ്യാപനം നടത്തിയത്. തന്റെ ഓർമക്കുറിപ്പുകളുടെ രണ്ടാം എഡിഷന്റെ പ്രകാശനച്ചടങ്ങിൽ 24 വർഷം എൻസിപി അധ്യക്ഷനായ താൻ പദവി ഒഴിയുന്നതായി പവാർ അറിയിച്ചു.