ന്യൂഡൽഹി: തമിഴ്നാട് നിയമസഭയിലെ വിശ്വാസ വോട്ടെടുപ്പിൽ പങ്കെടുക്കുന്നതിൽ നിന്ന് തമിഴക വെട്രി കഴകം എംഎൽഎ ആർ. ശ്രീനിവാസ സേതുപതിയെ വിലക്കിയ മദ്രാസ് ഹൈക്കോടതി ഉത്തരവ് സുപ്രീം കോടതി സ്റ്റേ ചെയ്തു (R Seenivasa Sethupathi Stay Order). ഹൈക്കോടതിയുടെ നടപടി “അതിക്രമമാണെന്ന്” വിശേഷിപ്പിച്ച ജസ്റ്റിസുമാരായ വിക്രം നാഥ്, സന്ദീപ് മേത്ത, വിജയ് ബിഷ്ണോയ് എന്നിവരടങ്ങിയ ബെഞ്ച്, കേസിൽ ഹൈക്കോടതിയിലുള്ള തുടർനടപടികളും നിർത്തിവെച്ചു.
ശിവഗംഗ ജില്ലയിലെ തിരുപ്പത്തൂർ മണ്ഡലത്തിൽ നിന്ന് ഒരു വോട്ടിന്റെ ഭൂരിപക്ഷത്തിനാണ് ശ്രീനിവാസ സേതുപതി വിജയിച്ചത്. മുൻ മന്ത്രിയും ഡിഎംകെ നേതാവുമായ കെ.ആർ. പെരിയകറുപ്പനെയാണ് അദ്ദേഹം പരാജയപ്പെടുത്തിയത്. വോട്ടെണ്ണലിൽ ക്രമക്കേട് ആരോപിച്ചു പെരിയകറുപ്പൻ നൽകിയ ഹർജിയിലാണ് ഹൈക്കോടതി എംഎൽഎയെ വിലക്കിയത്. തിരഞ്ഞെടുപ്പുമായി ബന്ധപ്പെട്ട തർക്കങ്ങളിൽ തിരഞ്ഞെടുപ്പ് ഹർജിയാണ് പരിഹാരമെന്ന് ഹൈക്കോടതി തന്നെ പറയുന്നുണ്ടെന്നും, എന്നിട്ടും ഇത്തരം റിട്ട് ഹർജികൾ പരിഗണിക്കുന്നത് ശരിയല്ലെന്നും സുപ്രീം കോടതി വ്യക്തമാക്കി. ഹൈക്കോടതി ഉത്തരവ് നിലനിൽക്കെത്തന്നെ ബുധനാഴ്ച നടന്ന വിശ്വാസ വോട്ടെടുപ്പിൽ വിജയ് നയിക്കുന്ന ടിവികെ സർക്കാർ വിജയിച്ചിരുന്നു.
സേതുപതിയുടെ ഹർജിയിൽ മറുപടി നൽകാൻ പെരിയകറുപ്പൻ ഉൾപ്പെടെയുള്ളവർക്ക് കോടതി രണ്ടാഴ്ചത്തെ സമയം അനുവദിച്ചു. മുതിർന്ന അഭിഭാഷകൻ അഭിഷേക് സിംഗ്വിയാണ് സേതുപതിക്ക് വേണ്ടി ഹാജരായത്. തിരഞ്ഞെടുപ്പ് വിജയത്തിന്റെ സാധുത ചോദ്യം ചെയ്യേണ്ടത് കൃത്യമായ നിയമവഴികളിലൂടെയായിരിക്കണമെന്നും കേവലം റിട്ട് ഹർജിയിലൂടെ ജനപ്രതിനിധിയുടെ അവകാശങ്ങൾ തടയാനാവില്ലെന്നും കോടതി നിരീക്ഷിച്ചു.
Summary: The Supreme Court stayed a Madras High Court order that restrained TVK MLA R. Seenivasa Sethupathi from participating in the Tamil Nadu Assembly floor test. Labeling the High Court’s intervention as “atrocious,” the apex court noted that election disputes should be handled through election petitions, not writ petitions. Amidst the legal battle, the Vijay-led TVK government successfully won the vote of confidence on Wednesday.
