ഇസ്ലാമാബാദ്: പാക് അധിനിവേശ കാശ്മീരിൽ നടക്കുന്ന വൻ പ്രക്ഷോഭങ്ങൾക്ക് നേരെ പാകിസ്ഥാൻ സൈന്യം നടത്തിയ വെടിവെപ്പിനെയും അതിക്രമങ്ങളെയും ന്യായീകരിച്ച് പാകിസ്ഥാൻ പ്രതിരോധ മന്ത്രി ഖ്വാജ ആസിഫ്. സർക്കാരിനും ഇസ്ലാമാബാദ് ഭരണകൂടത്തിനുമെതിരെ തെരുവിലിറങ്ങി പ്രതിഷേധിക്കുന്നവരെ ഇന്ത്യയെപ്പോലെ പാകിസ്ഥാന്റെ ശത്രുക്കളായാണ് കാണുന്നതെന്ന് അദ്ദേഹം വിവാദ പ്രസ്താവന നടത്തി.(Pakistan Defence Minister Khawaja Asif Calls PoK Protesters Enemies India Reacts)
ഒരു പ്രാദേശിക ടെലിവിഷൻ ചാനലിന് നൽകിയ അഭിമുഖത്തിലാണ് ഖ്വാജ ആസിഫ് പ്രതിഷേധക്കാർക്കെതിരെ ആഞ്ഞടിച്ചത്. പാക് അധിനിവേശ കാശ്മീരിലെ ജനങ്ങളുടെ രാഷ്ട്രീയ അവകാശങ്ങൾ കവരുന്നതിനെതിരെ ‘ജോയിന്റ് അവാമി ആക്ഷൻ കമ്മിറ്റി’ സംഘടിപ്പിച്ച റാവൽക്കോട്ട് – മുസഫറാബാദ് സമാധാന മാർച്ചിന് നേരെ പാക് സുരക്ഷാ സേന നടത്തിയ വെടിവെപ്പിൽ 14 പേർ കൊല്ലപ്പെട്ടിരുന്നു. ഇതിന് പിന്നാലെയാണ് പ്രതിരോധ മന്ത്രി പ്രക്ഷോഭകരുമായി യാതൊരു ചർച്ചയ്ക്കുമില്ലെന്ന് പ്രഖ്യാപിച്ചത്.
ജൂൺ 5-ന് ആരംഭിച്ച പ്രക്ഷോഭങ്ങളിലും തുടർന്നുണ്ടായ ക്രൂരമായ സൈനിക നടപടികളിലുമായി ഇതുവരെ 80-ലധികം ആളുകൾ കൊല്ലപ്പെട്ടിട്ടുണ്ടെന്നാണ് റിപ്പോർട്ടുകൾ. അതേസമയം, പാക് അധിനിവേശ കാശ്മീരിൽ നടത്തുന്ന തിരഞ്ഞെടുപ്പ് തങ്ങളുടെ നിയമവിരുദ്ധമായ അധിനിവേശത്തെ മറച്ചുവെക്കാനും മനുഷ്യാവകാശ ലംഘനങ്ങൾ മറയ്ക്കാനുമുള്ള പാകിസ്ഥാന്റെ ‘കാപട്യം’ മാത്രമാണെന്ന് ഇന്ത്യൻ വിദേശകാര്യ മന്ത്രാലയം തുറന്നടിച്ചു. പാക് അധിനിവേശ കാശ്മീർ ഉൾപ്പെടെയുള്ള ജമ്മു കാശ്മീരും ലഡാക്കും ഇന്ത്യയുടെ അവിഭാജ്യ ഘടകമാണെന്ന് വിദേശകാര്യ മന്ത്രാലയ വക്താവ് രൺധീർ ജയ്സ്വാൾ വ്യക്തമാക്കി. പാകിസ്ഥാന്റെ സാമ്പത്തിക ചൂഷണത്തിനും അവകാശനിഷേധത്തിനും അടിച്ചമർത്തലിനുമെതിരെ ജനങ്ങൾ നടത്തുന്ന പ്രതിഷേധമാണ് മേഖലയിൽ കാണുന്നതെന്നും ഇന്ത്യ കൂട്ടിച്ചേർത്തു.
Story Summary
Pakistan Defence Minister Khawaja Asif sparked outrage by labeling protesters in Pakistan-occupied Kashmir (PoK) as “enemies like India” while defending military crackdowns that killed at least 14 activists. India strongly condemned Pakistan’s military actions and dismissed the ongoing local elections in PoK as a cosmetic exercise to hide human rights violations and illegal occupation.
