മലപ്പുറം: കുറ്റിപ്പുറത്ത് അപകടത്തിൽപ്പെട്ട സ്വകാര്യ ബസ് സഞ്ചരിച്ചത് മണിക്കൂറിൽ 130 കിലോമീറ്റർ വേഗതയിലാണെന്ന് ശാസ്ത്രീയ അന്വേഷണത്തിൽ കണ്ടെത്തി. അപകടത്തെക്കുറിച്ച് അന്വേഷിക്കാൻ പോലീസ് രൂപീകരിച്ച നാറ്റ്പാക് (NATPAC), ദേശീയപാതാ അതോറിറ്റി (NHAI), മോട്ടോർ വാഹന വകുപ്പ് (MVD) എന്നിവരുടെ പ്രത്യേക സംയുക്ത അന്വേഷണ സംഘം ചൊവ്വാഴ്ച നടത്തിയ പരിശോധനയിലാണ് വേഗത സംബന്ധിച്ച ഡിജിറ്റൽ തെളിവുകൾ പുറത്തുവന്നത്.(Kuttippuram Bus Accident Private Bus Speed 130 kmph NATPAC MVD Investigation)
ആറുവരിപ്പാതയിലെ നിരീക്ഷണ ക്യാമറകളുടെ കുറ്റിപ്പുറത്തുള്ള കൺട്രോൾ റൂമിൽ നിന്നാണ് അന്വേഷണ സംഘം കൃത്യമായ ദൃശ്യങ്ങളും വിവരങ്ങളും ശേഖരിച്ചത്. ദേശീയപാതയിലെ സർവീസ് റോഡുകളിലേക്കും പുറത്തേക്കും പ്രവേശിക്കുന്ന ഭാഗങ്ങളിൽ വലിയ വാഹനങ്ങൾക്ക് അനുവദിച്ചിട്ടുള്ള പരമാവധി വേഗത 50 കിലോമീറ്ററാണ്. ആറുവരിപ്പാതയിൽ ഇത് 80 കിലോമീറ്ററുമാണ്.
എന്നാൽ അപകടം നടന്ന അത്താണി ബസാർ സർവീസ് റോഡിന് സമീപമെത്തുമ്പോൾ ബസ് 130 കിലോമീറ്റർ വേഗതയിലായിരുന്നുവെന്ന് ക്യാമറ ദൃശ്യങ്ങളിൽ വ്യക്തമാണ്. അമിതവേഗതയ്ക്ക് പുറമെ അപകട സമയത്ത് പെയ്ത കനത്ത മഴയും റോഡിൽ ടയറിന്റെ ഗ്രിപ്പ് നഷ്ടപ്പെടാൻ ഇടയാക്കിയതാണ് അപകടത്തിന്റെ വ്യാപ്തി കൂട്ടിയതെന്നാണ് സംഘത്തിന്റെ പ്രാഥമിക വിലയിരുത്തൽ. എല്ലാ പരിശോധനകൾക്കും ശേഷം ഗതാഗത കമ്മീഷണർക്ക് അന്തിമ റിപ്പോർട്ട് സമർപ്പിക്കുമെന്നും ഉദ്യോഗസ്ഥർ അറിയിച്ചു.
Story Summary
A joint investigation by NATPAC, NHAI, and MVD revealed that the private bus involved in the Kuttippuram accident was traveling at a dangerous speed of 130 km/h on a road with a 50 km/h limit. Digital evidence from surveillance cameras confirmed that extreme speeding combined with rain-soaked slippery roads led to the crash.
