ഹൈദരാബാദ്: അമേരിക്കയിലുണ്ടായ ദാരുണമായ വാഹനാപകടത്തിൽ തെലങ്കാന സ്വദേശിനിയായ യുവതിക്ക് ദാരുണാന്ത്യം. ഹൈദരാബാദ് രംഗാറെഡ്ഡി ജില്ലയിൽ നിന്നുള്ള ശ്രീപാതി ദീപാ റെഡ്ഡിയാണ് ന്യൂജേഴ്സിയിൽ വെച്ചുണ്ടായ കാറപകടത്തിൽ കൊല്ലപ്പെട്ടത്. ദിവസങ്ങൾക്കുള്ളിൽ ഇന്ത്യയിലേക്ക് തിരിക്കാൻ ഇരിക്കെയാണ് ദുരന്തം സംഭവിച്ചത്.(New Jersey Road Accident, Hyderabad Woman Deepa Reddy Killed)
സോഫ്റ്റ്വെയർ എഞ്ചിനീയറായ ദീപാ റെഡ്ഡി 2008 മുതൽ ഭർത്താവ് രാമകൃഷ്ണ റെഡ്ഡിക്കൊപ്പം അമേരിക്കയിലാണ് താമസിച്ച് വരുന്നത്. ഇവർക്ക് രണ്ട് പെൺമക്കളുണ്ട്.
ന്യൂജേഴ്സിയിൽ ദീപ സഞ്ചരിച്ചിരുന്ന കാർ മറ്റൊരു വാഹനവുമായി കൂട്ടിയിടിച്ചായിരുന്നു അപകടം. ഗുരുതരമായി പരിക്കേറ്റ ദീപ സംഭവസ്ഥലത്തുതന്നെ മരണപ്പെടുകയായിരുന്നു. അപകടത്തിന്റെ ആഘാതത്തിൽ തകർന്ന വാഹനങ്ങളുടെയും രക്ഷാപ്രവർത്തനം നടത്തുന്ന എമർജൻസി വിഭാഗത്തിന്റെയും ദൃശ്യങ്ങൾ സോഷ്യൽ മീഡിയയിൽ പ്രചരിക്കുന്നുണ്ട്.
അപകടത്തിന്റെ കാരണം വ്യക്തമല്ലെന്നും സംഭവത്തിൽ വിശദമായ അന്വേഷണം ആരംഭിച്ചതായും ന്യൂജേഴ്സി പോലീസ് അറിയിച്ചു. അതേസമയം, ദീപയുടെ അവയവങ്ങൾ ദാനം ചെയ്യാൻ കുടുംബാംഗങ്ങൾ തീരുമാനിച്ചിട്ടുണ്ട്. ദിവസങ്ങൾക്കുള്ളിൽ നാട്ടിലെത്തേണ്ട യുവതിയുടെ അപ്രതീക്ഷിത വേർപാടിന്റെ ആഘാതത്തിലാണ് ബന്ധുക്കൾ.
Story Summary
A Hyderabad-origin IT professional, Sripati Deepa Reddy, died in a car crash in New Jersey, US, just days before her scheduled trip to India. Living in the US since 2008 with her husband and two daughters, Deepa died at the scene, and her family has decided to donate her organs.
