നിസാമാബാദ്: തെലങ്കാനയിലെ നിസാമാബാദ് ജില്ലയിൽ ഭാര്യയും കാമുകനും ചേർന്ന് ഭർത്താവിനെ അതിക്രൂരമായി കൊലപ്പെടുത്തി. വിദേശത്തുനിന്ന് നാട്ടിലെത്തിയ പ്രശാന്ത് (35) എന്ന യുവാവാണ് ക്രൂരമായി കൊല്ലപ്പെട്ടത്. പ്രശാന്തിന്റെ ഭാര്യയും നഴ്സുമായ സന്ധ്യയും, കാമുകൻ അനിലും മറ്റൊരു സുഹൃത്ത് വെങ്കട സായിയും ചേർന്നാണ് കൊലപാതകം ആസൂത്രണം ചെയ്തതെന്ന് പോലീസ് വ്യക്തമാക്കി (Nurse Kills Husband). സന്ധ്യയുടെ അവിഹിത ബന്ധത്തിന് ഭർത്താവ് തടസ്സമായതാണ് കൊലപാതകത്തിലേക്ക് നയിച്ചത്.
ജൂൺ 29-ന് സുഹൃത്തായ വെങ്കട സായി പ്രശാന്തിനെ നിർബന്ധിച്ച് മദ്യം നൽകിയശേഷം കെട്ടിടത്തിന്റെ ടെറസിലേക്ക് കൂട്ടിക്കൊണ്ടുപോയി. അവിടെവെച്ച് ഇരുവരും തമ്മിൽ തർക്കമുണ്ടാകുകയും, സന്ധ്യയും വെങ്കട സായിയും ചേർന്ന് പ്രശാന്തിനെ മുകളിൽ നിന്ന് താഴേക്ക് തള്ളിയിടുകയുമായിരുന്നു. വീഴ്ചയിൽ ഗുരുതരമായി പരിക്കേറ്റ പ്രശാന്തിനെ ആദ്യം സർക്കാർ ആശുപത്രിയിലും പിന്നീട് സ്വകാര്യ ആശുപത്രിയിലും പ്രവേശിപ്പിച്ചു. എന്നാൽ, കൊലപാതക ശ്രമം പരാജയപ്പെട്ടെന്ന് മനസ്സിലാക്കിയ സന്ധ്യ, നഴ്സിംഗിലുള്ള തന്റെ അറിവ് ഉപയോഗിച്ച് ആശുപത്രിയിൽ വെച്ച് ഭർത്താവിനെ കൊലപ്പെടുത്താൻ തീരുമാനിച്ചു.
ജൂൺ 30-ന് ചികിത്സയിലിരിക്കെ പ്രശാന്തിന്റെ കാനുലയിലൂടെ ടോയ്ലറ്റ് ക്ലീനറും മറ്റ് വിഷാംശമുള്ള ലായനികളും സന്ധ്യ കുത്തിവെക്കുകയായിരുന്നു. ഇതേത്തുടർന്ന് പ്രശാന്ത് മരണപ്പെട്ടു. ജൂലൈ ഒന്നിന് പ്രശാന്തിന്റെ അമ്മയ്ക്ക് സംശയം തോന്നി പോലീസിൽ പരാതി നൽകിയതോടെയാണ് കൊലപാതകത്തിന്റെ ചുരുളഴിഞ്ഞത്. പോലീസിന്റെ ചോദ്യം ചെയ്യലിൽ വെങ്കട സായി കുറ്റം സമ്മതിച്ചു. സന്ധ്യയുടെ നിർദ്ദേശപ്രകാരമാണ് കൃത്യം നിർവഹിച്ചതെന്നും ഇതിനായി പണം നൽകിയിരുന്നുവെന്നും ഇയാൾ മൊഴി നൽകി. ജൂലൈ നാലിന് സന്ധ്യ, കാമുകൻ അനിൽ, സുഹൃത്ത് വെങ്കട സായി എന്നിവരെ പോലീസ് അറസ്റ്റ് ചെയ്യുകയും കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ വിടുകയും ചെയ്തു.
Summary: In a chilling case from Nizamabad, Telangana, a nurse named Sandhya allegedly murdered her husband, Prashant, with the help of her lover and a friend. After initially failing to kill him by pushing him off a building, the wife used her medical knowledge to inject toilet cleaner and toxic substances into his IV cannula while he was hospitalized, successfully causing his death. All three suspects are now in judicial custody following a complaint filed by the victim’s mother.
