മുംബൈ: മുംബൈയിലെ പ്രശസ്തമായ മൂന്ന് റെസ്റ്റോറന്റുകളുടെ ലൈസൻസ് മഹാരാഷ്ട്ര ഫുഡ് ആൻഡ് ഡ്രഗ് അഡ്മിനിസ്ട്രേഷൻ സസ്പെൻഡ് ചെയ്തു. ഭേണ്ടി ബസാറിലെ ശാലിമാർ ഹോട്ടൽ, നൂർ മുഹമ്മദി ഹോട്ടൽ, ഉമർ ഖാദിയിലെ റഹ്മാനിയ റെസ്റ്റോറന്റ് എന്നിവയുടെ ലൈസൻസാണ് ഗുരുതരമായ ശുചിത്വ ലംഘനങ്ങളെ തുടർന്ന് റദ്ദാക്കിയത്.(Mumbai Iconic Restaurants Shalimar And Noor Mohammadi Licences Suspended By Maharashtra FDA)
എഫ്.ഡി.എ നടത്തിയ പുനഃപരിശോധനയിൽ ശാലിമാർ ഹോട്ടലിൽ മാത്രം 25 ഗുരുതര നിയമലംഘനങ്ങൾ കണ്ടെത്തി. വഴുക്കലുള്ള അടുക്കളത്തറ, സസ്യ-സസ്യേതര ഭക്ഷണങ്ങൾ വേർതിരിക്കാതിരിക്കൽ, കുടിവെള്ള പരിശോധനാ റിപ്പോർട്ടുകളുടെ അഭാവം എന്നിവ ഇവിടെയുണ്ടായിരുന്നു. നൂർ മുഹമ്മദിയിൽ അടുക്കളയിലെ കട്ടിയുള്ള എണ്ണ നിക്ഷേപം, ഗുണനിലവാരമില്ലാത്ത അസംസ്കൃത പദാർത്ഥങ്ങളുടെ സംഭരണം എന്നിവയും റഹ്മാനിയയിൽ മോശം സംഭരണ സംവിധാനവും കീടനാശിനി പ്രയോഗത്തിന്റെ അഭാവവും ഉദ്യോഗസ്ഥർ കണ്ടെത്തി. കൂടാതെ അമരാവതിയിലെ ദർബാർ ഹോട്ടലിന് സാധുവായ ലൈസൻസ് ഇല്ലാത്തതിനാൽ നോട്ടീസ് നൽകി.
സംസ്ഥാനത്തുടനീളം എഫ്.ഡി.എ കമ്മീഷണർ തുക്കാറാം മുണ്ടെയുടെ നേതൃത്വത്തിൽ നടക്കുന്ന ‘സേഫ് ഫുഡ്, സേഫ് മഹാരാഷ്ട്ര’ കാമ്പയിന്റെ ഭാഗമായി ഒരൊറ്റ ദിവസം കൊണ്ട് 1.68 കോടി രൂപയുടെ മായം ചേർത്തതും നിരോധിച്ചതുമായ ഭക്ഷ്യവസ്തുക്കളാണ് പിടിച്ചെടുത്തത്. ഇതിൽ താനെയിലെ ഭിവാണ്ടിയിലെ വെയർഹൗസിൽ നിന്ന് പിടിച്ചെടുത്ത 1 കോടി രൂപ വിലമതിക്കുന്ന 22,100 കിലോ ഗുണനിലവാരമില്ലാത്ത പാൽപ്പൊടിയും ഉൾപ്പെടുന്നു. അമരാവതി, വിരാർ, മീരാ റോഡ്, റായ്ഗഡ് എന്നിവിടങ്ങളിൽ നിന്നായി 55 ലക്ഷത്തിലധികം രൂപയുടെ നിരോധിച്ച ഗുഡ്കയും പാൻമസാലയും പിടിച്ചെടുത്ത് കേസെടുത്തിട്ടുണ്ട്. ഭക്ഷ്യസുരക്ഷാ ലംഘനങ്ങൾ ശ്രദ്ധയിൽപ്പെട്ടാൽ ടോൾ ഫ്രീ നമ്പറായ 1800-222-365 വഴിയോ ആപ്പ് വഴിയോ പൊതുജനങ്ങൾക്ക് പരാതിപ്പെടാമെന്ന് എഫ്.ഡി.എ അറിയിച്ചു.
Story Summary
The Maharashtra FDA has suspended the food licenses of iconic Mumbai restaurants, including Shalimar, Noor Mohammadi, and Rahmania, over severe hygiene and food safety violations. The action is part of a massive state-wide drive that led to the seizure of adulterated dairy products and banned tobacco items worth ₹1.68 crores. A raid in Bhiwandi alone uncovered sub-standard skimmed milk powder valued at ₹1 crore.
