മുംബൈയിൽ പരസ്യ ബോർഡ് തകർന്നുണ്ടായ അപകടം: മരണസംഖ്യ 14 ആയി, രക്ഷാപ്രവർത്തനം പുരോഗമിക്കുന്നു
May 14, 2024, 11:25 IST
മുംബൈ: കൂറ്റന്‍ പരസ്യബോര്‍ഡ് തകര്‍ന്നുവീണ് മുംബൈയിൽ മരണപ്പെട്ടവരുടെ എണ്ണം 14 ആയി. 74 പേർക്ക് പരിക്കേറ്റതായാണ് വിവരം. ആശുപത്രിയിൽ കഴിയുന്ന ഒരാളുടെ അവസ്ഥ ഗുരുതരമാണ്. തിങ്കളാഴ്ച വൈകുന്നേരം പെയ്ത മഴയിലും പൊടിക്കാറ്റിലും ഘാട്‌കോപ്പറില്‍ സ്ഥാപിച്ച കൂറ്റന്‍ പരസ്യബോര്‍ഡ് പെട്രോള് പമ്പിന് മുകളിലേക്ക് മറിഞ്ഞുവീഴുകയായിരുന്നു. പെട്രോള് പമ്പില്‍ ഉണ്ടായിരുന്ന കാറുകള്‍ അടക്കമുള്ളവയിലേക്ക് പരസ്യ ബോര്‍ഡിന്‍റെ ഇരുമ്പ് കാലുകള്‍ തുളച്ചുകയറുകയും ചെയ്തു. സർക്കാർ സംഭവത്തിൽ ഉന്നതതല അന്വേഷണം പ്രഖ്യാപിക്കുകയും മരിച്ചവരുടെ കുടുംബങ്ങൾക്ക് 5 ലക്ഷം രൂപ വീതം ധനസഹായം പ്രഖ്യാപിക്കുകയും ചെയ്തു. സംഭവസ്ഥലത്ത് രക്ഷാപ്രവർത്തനം പുരോഗമിക്കുകയാണ്. പന്ത് നഗർ പോലീസ് സംഭവത്തിൽ പരസ്യ കമ്പനി ഉടമകൾക്കെതിരെ മനഃപൂർവമല്ലാത്ത നരഹത്യയ്‌ക്ക് കേസെടുത്തു. അനധികൃതമായാണ് അപകടത്തിനിടയാക്കിയ കൂറ്റൻ പരസ്യ ബോർഡ് സ്ഥാപിച്ചതെന്ന് കണ്ടെത്തിയതാണ് കാരണം. അധികൃതർ അറിയിച്ചത് നഗരത്തിലെ റെയിൽ – റോഡ് ഗതാഗതം പുനസ്ഥാപിച്ചതായാണ്. ഇന്നും മുംബൈയിൽ ശക്തമായ കാറ്റും മഴയും ഉണ്ടാകാൻ സാധ്യതയുണ്ടെന്നാണ് കാലാവസ്ഥാ വകുപ്പ് പ്രവചിച്ചിരിക്കുന്നത്.