കർണാടക നേതാക്കൾ തിരഞ്ഞെടുപ്പ് ഫലം വിശകലനം ചെയ്യട്ടെ:  പ്രതികരിക്കാൻ വിസമ്മതിച്ച്  വി മുരളീധരൻ

കർണാടക നിയമസഭാ തിരഞ്ഞെടുപ്പിലെ ബിജെപിയുടെ പരാജയത്തെക്കുറിച്ച് പ്രതികരിക്കാൻ വിദേശകാര്യ, പാർലമെന്ററി കാര്യ സഹമന്ത്രി വി മുരളീധരൻ വിസമ്മതിച്ചു. മാധ്യമപ്രവർത്തകരുടെ പ്രതികരണം ചോദിച്ചപ്പോൾ കർണാടകയിലാണ് തിരഞ്ഞെടുപ്പ് നടന്നതെന്നും കേരളത്തിലെ നേതാവാണ് താനെന്നും അദ്ദേഹം വ്യക്തമാക്കി. കർണാടക നേതാക്കൾ തിരഞ്ഞെടുപ്പ് ഫലം വിശകലനം ചെയ്ത് അഭിപ്രായം പറയുമെന്ന് അദ്ദേഹം നിർദ്ദേശിച്ചു. കേന്ദ്രമന്ത്രിയായതിനാൽ വകുപ്പു കാര്യങ്ങളെക്കുറിച്ച് സംസാരിക്കാനാണ് താൻ ആഗ്രഹിക്കുന്നതെന്നും അദ്ദേഹം പറഞ്ഞു.

രാഷ്ട്രീയ പാർട്ടികൾക്ക് തിരഞ്ഞെടുപ്പിൽ ജയവും തോൽവിയും സ്വാഭാവികമാണെന്നും മുരളീധരൻ പറഞ്ഞു. ബിജെപി ജനങ്ങൾക്ക് വേണ്ടിയാണ് നിലകൊള്ളുന്നത്. തെരഞ്ഞെടുപ്പിൽ തോറ്റതുകൊണ്ട് മാത്രം അത് ഇല്ലാതാകില്ലെന്നും അദ്ദേഹം പറഞ്ഞു.