ബെളഗാവി: കർണാടകയിൽ മുൻ സൈനിക ഉദ്യോഗസ്ഥന്റെ മരണം ഹൃദയാഘാതമാണെന്ന് ആദ്യം കരുതിയെങ്കിലും, അന്വേഷണത്തിൽ പുറത്തുവന്ന വിവരങ്ങൾ ഞെട്ടിക്കുന്നതാണ്. 2 കോടി രൂപയുടെ ഇൻഷുറൻസ് തുക തട്ടിയെടുക്കുന്നതിനായി ഭാര്യയും കാമുകനും ചേർന്ന് ആശുപത്രിയിൽവെച്ച് ഇയാളെ വിഷം നൽകി കൊലപ്പെടുത്തിയെന്നാണ് പോലീസിന്റെ കണ്ടെത്തൽ (Karnataka Insurance Murder). സംഭവത്തിൽ കൊല്ലപ്പെട്ട സന്ദീപ് മഞ്ജാർഗിയുടെ ഭാര്യ സുമ മഞ്ജാർഗി, കാമുകൻ പുണ്ടലിക് ഡോംബാർ എന്നിവരടക്കം ഒമ്പത് പേരെ പോലീസ് അറസ്റ്റ് ചെയ്തു. ആശുപത്രി ജീവനക്കാർ, ലബോറട്ടറി ഉദ്യോഗസ്ഥർ, ഫോറൻസിക് വിഭാഗത്തിലെ ചിലർ എന്നിവരും ഗൂഢാലോചനയിൽ പങ്കുണ്ടെന്നാണ് ആരോപണം.
മാർച്ച് 13-ന് സന്ദീപ് മഞ്ജാർഗി ചെറിയൊരു ബൈക്ക് അപകടത്തിൽപ്പെട്ടിരുന്നു. ആദ്യം ഹുക്കേരി സർക്കാർ ആശുപത്രിയിൽ പ്രവേശിപ്പിച്ച ഇയാളെ പിന്നീട് ഭാര്യയുടെ ആവശ്യപ്രകാരം ഘടപ്രഭയിലെ സ്വകാര്യ ആശുപത്രിയിലേക്ക് മാറ്റി. ഗുരുതര പരിക്കുകളൊന്നുമില്ലാതിരുന്ന സന്ദീപ് രണ്ട് ദിവസങ്ങൾക്ക് ശേഷം മരിച്ചതോടെയാണ് സംശയങ്ങൾ ഉയർന്നത്. മരണകാരണം ഹൃദയാഘാതമാണെന്നാണ് ആദ്യ റിപ്പോർട്ടുകളിൽ രേഖപ്പെടുത്തിയത്. പോസ്റ്റ്മോർട്ടം പരിശോധനയിലും വിഷാംശം കണ്ടെത്തിയില്ലെന്നായിരുന്നു നിഗമനം. എന്നാൽ പിന്നീട് നടന്ന അന്വേഷണത്തിലാണ് കേസ് മറ്റൊരു വഴിത്തിരിവിലേക്ക് നീങ്ങിയത്.
സന്ദീപിന്റെ മരണവുമായി ബന്ധപ്പെട്ട് കാമുകനായ പുണ്ടലിക് ഡോംബാർ സോഷ്യൽ മീഡിയയിൽ പങ്കുവെച്ച ഒരു പോസ്റ്റാണ് പോലീസിന്റെ ശ്രദ്ധ പിടിച്ചുപറ്റിയത്. അപകടത്തിൽപ്പെട്ട ഒരാൾ പെട്ടെന്ന് മരിച്ചതിനെക്കുറിച്ചുള്ള പരാമർശം നടത്തിയ ഇയാളെ ചോദ്യം ചെയ്തതോടെയാണ് ഗൂഢാലോചനയുടെ വിവരങ്ങൾ പുറത്തുവന്നതെന്ന് റിപ്പോർട്ടുകൾ പറയുന്നു. സന്ദീപിന്റെ പേരിൽ വിവിധ കമ്പനികളിലായി ഏകദേശം രണ്ട് കോടി രൂപയുടെ ഇൻഷുറൻസ് പോളിസികൾ എടുത്തിരുന്നതായി അന്വേഷണത്തിൽ കണ്ടെത്തി. ഈ തുക കൈവശപ്പെടുത്താനാണ് കൊലപാതകം ആസൂത്രണം ചെയ്തതെന്നാണ് പോലീസിന്റെ നിഗമനം. സുമയും പുണ്ടലിക്കും തമ്മിൽ വിവാഹേതര ബന്ധമുണ്ടായിരുന്നുവെന്നും, ചികിത്സയിലിരിക്കെ സലൈൻ വഴിയും ഉറക്കഗുളികകൾ വഴിയും സന്ദീപിന് വിഷം നൽകിയതായും അന്വേഷണ സംഘം ആരോപിക്കുന്നു.
മരണത്തെ സ്വാഭാവികമെന്ന് ചിത്രീകരിക്കാൻ മെഡിക്കൽ രേഖകളിലും ഫോറൻസിക് റിപ്പോർട്ടുകളിലും തിരുത്തലുകൾ വരുത്തിയതായും പോലീസ് പറയുന്നു. വിഷാംശ പരിശോധനാ ഫലങ്ങൾ മാറ്റിമറിക്കാനും തെളിവുകൾ ഇല്ലാതാക്കാനും ലക്ഷങ്ങൾ ചെലവഴിച്ചുവെന്നാണ് അന്വേഷണത്തിൽ കണ്ടെത്തിയത്. മൂന്ന് ലക്ഷത്തിലധികം രൂപ ചില ഉദ്യോഗസ്ഥർക്ക് കൈമാറി റിപ്പോർട്ടുകൾ സ്വാധീനിക്കാൻ ശ്രമിച്ചെന്നാണ് പോലീസിന്റെ ആരോപണം. പരിശോധനയ്ക്കിടെ വിഷക്കുപ്പികൾ, സിറിഞ്ചുകൾ, മൊബൈൽ ഫോണുകൾ തുടങ്ങിയ നിർണായക തെളിവുകളും പോലീസ് പിടിച്ചെടുത്തു. സുമ മഞ്ജാർഗി, പുണ്ടലിക് ഡോംബാർ, സ്വകാര്യ ഡോക്ടർ ബസവരാജ് ഭാസ്മെ, എഫ്ഡിഎ ഉദ്യോഗസ്ഥൻ അശോക് ഗുജനാൽ, ഫോറൻസിക് ലാബ് ജീവനക്കാർ ഉൾപ്പെടെ ഒമ്പത് പേരാണ് കേസിൽ അറസ്റ്റിലായിരിക്കുന്നത്. സംഭവത്തിൽ കൂടുതൽ പേർക്ക് പങ്കുണ്ടോയെന്ന് അന്വേഷിച്ചുവരികയാണെന്ന് പോലീസ് അറിയിച്ചു.
Summary: In a chilling case from Karnataka’s Belagavi district, the wife of a former Army serviceman, Suma Manjargi, and her lover, Pundalik Dombar, have been arrested for orchestrating his murder to claim Rs 2 crore in insurance money. The couple conspired with hospital and forensic staff to pass off the death—caused by administered poison—as a cardiac arrest. A social media post by the lover inadvertently raised police suspicions, leading to the arrest of nine individuals, including medical and forensic personnel who allegedly accepted bribes to manipulate official reports.
