ഹരിയാന മനപ്പൂർവ്വം നിയമവിരുദ്ധമായി ഡൽഹിയിലേക്കുള്ള ജലവിതരണം നിർത്തി: അതിഷി

​​​​​​​

ഡൽഹി ജലമന്ത്രി അതിഷി ചൊവ്വാഴ്ച ഹരിയാന സർക്കാരിനെ രൂക്ഷമായി വിമർശിക്കുകയും തലസ്ഥാനത്തേക്കുള്ള ജലവിതരണം മനപ്പൂർവ്വം നിയമവിരുദ്ധമായി നിർത്തുകയാണെന്ന് ആരോപിച്ചു. ഹരിയാന സർക്കാർ നഗരത്തിലേക്ക് കുറച്ച് വെള്ളം വിട്ടുകൊടുക്കുന്നതിനാൽ ഡൽഹിക്ക് ദൈനംദിന ജല ആവശ്യകത നിറവേറ്റാൻ കഴിയുന്നില്ലെന്ന്  ഒരു പത്രസമ്മേളനത്തിൽ അതിഷി ആരോപിച്ചു.

ഹരിയാന സർക്കാർ സുപ്രീം കോടതിയിൽ സമർപ്പിച്ച സത്യവാങ്മൂലം ഉദ്ധരിച്ചുകൊണ്ട് മന്ത്രി പറഞ്ഞു, “ഡൽഹിയിലേക്ക് ആവശ്യമായ വെള്ളം വിട്ടുകൊടുത്തുവെന്ന് ഹരിയാന സർക്കാർ കള്ളം പറയുകയാണ്. അവർ സുപ്രീം കോടതിയിൽ സമർപ്പിച്ച സത്യവാങ്മൂലത്തിൽ വെള്ളം യഥാർത്ഥത്തിൽ പുറന്തള്ളുന്നത് സംബന്ധിച്ച വിവരങ്ങൾ അവതരിപ്പിക്കുന്നു." 

ഡൽഹി തിരഞ്ഞെടുപ്പിന് മുന്നോടിയായി മെയ് 23 മുതൽ ഹരിയാന സർക്കാർ തുറന്നുവിട്ട വെള്ളത്തിൻ്റെ അളവ് കുറച്ചതായി സത്യവാങ്മൂലത്തിൽ പറയുന്നു.“മെയ് 1 മുതൽ 22 വരെ ഹരിയാന സിഎൽസിയിൽ 719 ക്യുസെക്‌സ് വെള്ളവും ഡിഎസ്‌ബിയിൽ 330 ക്യുസെക്‌സ് വെള്ളവും മുനക് കനാൽ വഴി തുറന്നുവിടുന്നുണ്ടെന്ന് ഹരിയാന സർക്കാർ സുപ്രീം കോടതിയിൽ നൽകിയ സത്യവാങ്മൂലത്തിലെ കണക്കുകൾ കാണിക്കുന്നു. അതായത് 1049 ക്യുസെക്‌സ് വെള്ള൦ . എന്നാൽ ഇതിന് ശേഷം മെയ് 23 മുതൽ ഇത് കുറയാൻ തുടങ്ങി. അതായത്, ഡൽഹിയിൽ തിരഞ്ഞെടുപ്പ് നടന്നപ്പോൾ ഹരിയാന വെള്ളം അയക്കുന്നത് കുറച്ചിരുന്നു," അതിഷി പറഞ്ഞു.