ഗുരുഗ്രാം: ചൊവ്വാഴ്ച ഉച്ചയ്ക്ക് പെയ്ത കനത്ത കാലവർഷ മഴയിൽ ഗുരുഗ്രാം നഗരം പാടേ സ്തംഭിച്ചു. വെറും രണ്ട് മണിക്കൂറിനുള്ളിൽ 82 മില്ലിമീറ്റർ മഴയാണ് നഗരത്തിൽ രേഖപ്പെടുത്തിയത്. കനത്ത മഴയെത്തുടർന്ന് പ്രധാന റോഡുകൾ തകരുകയും നഗരത്തിന്റെ മിക്ക ഭാഗങ്ങളും വെള്ളത്തിനടിയിലാവുകയും ചെയ്തതോടെ കിലോമീറ്ററുകളോളം നീണ്ട വൻ ഗതാഗതക്കുരുക്കാണ് അനുഭവപ്പെട്ടത്.(Gurugram Rain Waterlogging, Heavy Monsoon Rain And Highway Cave Trigger Massive Traffic Jams)
ഉച്ചയ്ക്ക് 2 മണിക്ക് ആരംഭിച്ച് 4 മണി വരെ നീണ്ടുനിന്ന മഴ നഗരത്തിലെ അടിസ്ഥാന സൗകര്യങ്ങളുടെ പോരായ്മകൾ പൂർണ്ണമായും തുറന്നുകാട്ടി. ഡൽഹി-ജയ്പൂർ ദേശീയപാതയുടെ (NH-48) നർസിങ്പൂരിന് സമീപമുള്ള ഒരു ഭാഗം പൂർണ്ണമായി ഇടിഞ്ഞുതാണു. റോഡിൽ വൻ ഗർത്തം രൂപപ്പെട്ടു.
ഇതോടെ രണ്ട് ലെയ്നുകൾ അടച്ചിടേണ്ടി വന്നത് ഇഫ്കോ ചൗക്ക് മുതൽ ഖേർകി ദൗല ടോൾ പ്ലാസ വരെ 8 മുതൽ 10 കിലോമീറ്റർ നീളത്തിൽ വാഹനങ്ങളുടെ നിരയ്ക്ക് കാരണമായി. ആയിരക്കണക്കിന് യാത്രക്കാരാണ് മണിക്കൂറുകളോളം വഴിയിൽ കുടുങ്ങിയത്. ഗുരുഗ്രാം മെട്രോപൊളിറ്റൻ ഡെവലപ്മെന്റ് അതോറിറ്റി പൈപ്പ് കൽവർട്ട് ജോലികൾ നടത്തിയിരുന്ന ഭാഗമാണ് മഴയിൽ ഇടിഞ്ഞുതാണത്.
നഗരത്തിലെ വിവിഐപി മേഖലയായ സിവിൽ ലൈൻസ് റോഡിലും സമാനമായ രീതിയിൽ റോഡ് ഇടിഞ്ഞുതാണു. സിവറേജ് പൈപ്പ് ലൈൻ ജോലികൾക്കായി അടുത്തിടെ വെട്ടിപ്പൊളിച്ച റോഡാണ് തകർന്നത്. ഹീറോ ഹോണ്ട ചൗക്ക്, രാജീവ് ചൗക്ക്, സോഹ്ന റോഡ്, ഉദ്യോഗ് വിഹാർ, പഴയ ഡൽഹി റോഡ് തുടങ്ങി നഗരത്തിലെ പ്രധാന മേഖലകളെല്ലാം വെള്ളക്കെട്ടിലായി. ഇതിനിടയിൽ സ്കൂൾ ബസ് ദേശീയപാതയിലെ തുറന്ന ഓടയിലേക്ക് മറിഞ്ഞെങ്കിലും സംഭവസമയത്ത് കുട്ടികൾ ഇല്ലാതിരുന്നതിനാൽ വൻ ദുരന്തം ഒഴിവായി. സ്ഥിതിഗതികൾ വഷളായതോടെ ഡൽഹി, ഗുരുഗ്രാം ട്രാഫിക് പോലീസ് സംയുക്തമായി യാത്രാ നിർദ്ദേശങ്ങൾ പുറപ്പെടുവിച്ചു.
Story Summary
Gurugram was paralyzed by its first heavy monsoon spell, receiving 82 mm of rain in just two hours, which triggered severe waterlogging and a major road cave-in on the Delhi–Jaipur highway (NH-48). The resulting infrastructure damage led to an 8–10 km traffic jam, prompting emergency route diversions by the traffic police and raising serious concerns over the city’s drainage and road quality.
