ദുർഗ്: പ്രണയപ്പകയെത്തുടർന്ന് കാമുകിയെ കൊലപ്പെടുത്തി കാമുകൻ പിടിയിൽ. ഛത്തീസ്ഗഢിലെ ദുർഗ് ജില്ലയിലാണ് ഞെട്ടിക്കുന്ന സംഭവം നടന്നത്. ഖൈരാഗഡ് സ്വദേശിനിയായ 26-കാരി യുനശ്വരി വർമ്മയാണ് കൊല്ലപ്പെട്ടത് (Durg Murder Case). സംഭവത്തിൽ കാമുകൻ കാർത്തിക് റാം സാഹുവിനെ (27) പോലീസ് അറസ്റ്റ് ചെയ്തു. ബി.എഡ് പഠനത്തിനിടെയാണ് കാർത്തിക്കും യുനശ്വരിയും സൗഹൃദത്തിലായതും പിന്നീട് പ്രണയത്തിലായതും. ദുർഗിൽ പഠനത്തിനായി താമസിക്കുകയായിരുന്നു യുനശ്വരി.
യുനശ്വരിക്ക് മറ്റൊരു ബന്ധമുണ്ടെന്ന കാർത്തിക്കിന്റെ സംശയമാണ് കൊലപാതകത്തിൽ കലാശിച്ചത്. ഇതിനെച്ചൊല്ലി ഇരുവരും തമ്മിൽ നിരന്തരം വഴക്കുണ്ടായിരുന്നു. ഏപ്രിൽ 17-ന് ഉച്ചയ്ക്ക് ഒന്നിന് സുഭാഷ് നഗറിലെ തന്റെ വാടക മുറിയിലേക്ക് യുനശ്വരിയെ കാർത്തിക് വിളിച്ചുവരുത്തി. അവിടെ വെച്ചുണ്ടായ തർക്കത്തിനൊടുവിൽ കാർത്തിക് യുനശ്വരിയെ ശ്വാസം മുട്ടിച്ച് കൊലപ്പെടുത്തുകയായിരുന്നു. കൊലപാതകത്തിന് ശേഷം കാർത്തിക് തന്നെ പോലീസിനെ വിളിക്കുകയും കാമുകി ബോധരഹിതയായി വീണുവെന്ന് അറിയിക്കുകയും ചെയ്തു. പോലീസ് എത്തി യുവതിയെ ആശുപത്രിയിലെത്തിച്ചെങ്കിലും ഡോക്ടർമാർ മരണം സ്ഥിരീകരിച്ചു.
പോലീസിന്റെയും ഫോറൻസിക് സംഘത്തിന്റെയും പരിശോധനയിൽ മുറിയിലെ സാഹചര്യങ്ങൾ കൊലപാതകമാണെന്ന സൂചന നൽകി. തുടർന്ന് നടത്തിയ ചോദ്യം ചെയ്യലിൽ കാർത്തിക് കുറ്റം സമ്മതിച്ചു.
Summary: A 27-year-old man, Kartik Ram Sahu, allegedly murdered his girlfriend, Yuneshwari Verma (26), in Durg, Chhattisgarh, suspecting her of having an affair. After strangling her in his rented room, the accused called the police claiming she had fainted. However, hospital authorities declared her dead, and forensic evidence led to Kartik’s confession. The two were B.Ed students who had been in a relationship. Police have registered a case under the Bharatiya Nyaya Sanhita, and further investigation is underway.
