റായ്പൂർ: വിദേശ വിനോദസഞ്ചാരികളെ സഹായിക്കുന്ന ഗൈഡായോ, യോഗ പരിശീലകനായോ, ഇംഗ്ലീഷ് അധ്യാപകനായോ വേഷം മാറി പഞ്ചനക്ഷത്ര ഹോട്ടലുകളിൽ താമസിച്ച് ബില്ലടയ്ക്കാതെ മുങ്ങുന്ന 69-കാരൻ പിടിയിൽ (Bingson John Serial Fraud). തമിഴ്നാട് സ്വദേശിയായ ബിങ്സൺ ജോൺ ആണ് റായ്പൂർ പോലീസിന്റെ പിടിയിലായത്. കഴിഞ്ഞ മൂന്ന് പതിറ്റാണ്ടിനിടെ രാജ്യത്തുടനീളമുള്ള 300-ഓളം ആഡംബര ഹോട്ടലുകളിൽ ഇയാൾ ഇതേരീതിയിൽ തട്ടിപ്പ് നടത്തിയിട്ടുണ്ടെന്ന് പോലീസ് പറയുന്നു.
റായ്പൂരിലെ ഹയാത്ത് ഹോട്ടലിൽ രണ്ട് ദിവസം താമസിച്ച് 63,755 രൂപയുടെ ബില്ലടയ്ക്കാതെയും, 1.48 ലക്ഷം രൂപ വിലമതിക്കുന്ന ലാപ്ടോപ്പ് മോഷ്ടിച്ചും കടന്നുകളഞ്ഞതാണ് ഇയാളെ ഒടുവിൽ കുടുക്കിയത്. ഹോട്ടൽ അധികൃതരുടെ പരാതിയെത്തുടർന്ന് നടത്തിയ അന്വേഷണത്തിൽ ഒഡീഷയിലെ ഭുവനേശ്വറിൽ വെച്ചാണ് ഇയാളെ പിടികൂടിയത്. തിഹാർ ജയിലിൽ കഴിഞ്ഞിരുന്ന കാലത്ത് കുപ്രസിദ്ധ കുറ്റവാളി ചാൾസ് ശോഭരാജിന്റെ തട്ടിപ്പ് രീതികളിൽ ആകൃഷ്ടനായ ശേഷമാണ് ഇയാൾ ഇത്തരത്തിൽ പ്രവർത്തിക്കാൻ തുടങ്ങിയതെന്ന് ചോദ്യം ചെയ്യലിൽ വെളിപ്പെടുത്തി.
1980-കളിൽ ഡൽഹിയിൽ ടൂറിസ്റ്റ് ഗൈഡായി ജോലി ചെയ്തിരുന്ന സമയത്താണ് ഇയാൾ ഹോട്ടലുകളിലെ സൗജന്യ താമസത്തെക്കുറിച്ച് അറിയുന്നത്. ഒരു തവണ ഒരു ആഡംബര ഹോട്ടൽ ജീവനക്കാരിൽ നിന്നുണ്ടായ അപമാനമാണ് ഇത്തരം തട്ടിപ്പുകളിലേക്ക് തിരിയാൻ കാരണമെന്നും ഇയാൾ പോലീസിനോട് പറഞ്ഞു. 1996-ൽ ആദ്യമായി പിടിയിലായ ഇയാൾ കേരളം, തമിഴ്നാട്, ഗോവ, മഹാരാഷ്ട്ര, കർണാടക തുടങ്ങിയ സംസ്ഥാനങ്ങളിലെ വിവിധ ജയിലുകളിലായി ഏകദേശം 15 വർഷം ശിക്ഷ അനുഭവിച്ചിട്ടുണ്ട്.
വളരെ മാന്യമായ രീതിയിൽ പെരുമാറുന്ന ഇയാളെ കണ്ട് ഹോട്ടൽ ജീവനക്കാർ അഡ്വാൻസ് പണം പോലും ചോദിക്കാറില്ലെന്ന് പോലീസ് വ്യക്തമാക്കുന്നു. 2022-ൽ തിരുവനന്തപുരത്തെ ഒരു ഹോട്ടലിൽ നിന്ന് ബില്ലടയ്ക്കാതെയും ലാപ്ടോപ്പ് മോഷ്ടിച്ചും കടന്നതിനും ഇയാൾ പിടിയിലായിരുന്നു. ബിങ്സൺ ജോണിന്റെ ക്രിമിനൽ പശ്ചാത്തലം പരിശോധിച്ചുവരികയാണെന്നും, മറ്റ് സംസ്ഥാനങ്ങളിൽ ഇയാൾക്കെതിരെയുള്ള കേസുകളുടെ വിവരങ്ങൾ ശേഖരിച്ചുകൊണ്ടിരിക്കുകയാണെന്നും റായ്പൂർ പോലീസ് അറിയിച്ചു.
Summary: A 69-year-old conman, Bingson John, has been arrested for defrauding over 300 luxury hotels across India over three decades. Inspired by the deceptive tactics of Charles Sobhraj, John used fake identities to stay in five-star hotels and leave without paying bills, often stealing valuable property before being caught in Odisha following his latest heist in Raipur.
