ഗാസിയാബാദ്: ഉത്തർപ്രദേശിലെ ഗാസിയാബാദിൽ ശക്തമായ മഴയെത്തുടർന്ന് റോഡ് ഇടിഞ്ഞുതാഴ്ന്നു. വസുന്ധരയിലെ അടൽ ചൗക്കിന് സമീപം റോഡിന്റെ ഒരു ഭാഗം പൂർണ്ണമായും ഇടിഞ്ഞുതാഴുകയായിരുന്നു (Ghaziabad road cave-in). റോഡരികിലെ നിർമ്മാണ സ്ഥലത്ത് നിന്ന് മണ്ണ് ഒലിച്ചുപോയതാണ് റോഡ് തകരാൻ കാരണമായത്. പാർക്ക് ചെയ്തിരുന്ന ഒരു കാറും സ്കൂട്ടറും ഇതിനെത്തുടർന്ന് വലിയ കുഴിയിലേക്ക് വീണു.
സംഭവസമയത്ത് വാഹനങ്ങളിൽ ആളുകൾ ഇല്ലാതിരുന്നതിനാൽ വൻ അപകടം ഒഴിവാക്കാനായി. ഹൈഡ്രോളിക് ക്രെയിൻ ഉപയോഗിച്ച് വാഹനങ്ങൾ പുറത്തെടുക്കാനുള്ള ശ്രമങ്ങൾ തുടരുകയാണ്. വിവരമറിഞ്ഞ ഉടൻ പോലീസ് സ്ഥലത്തെത്തുകയും ഗതാഗതം തടസ്സപ്പെടുത്തുകയും ചെയ്തു. ഡൽഹി-എൻസിആർ മേഖലയിൽ കഴിഞ്ഞ കുറച്ചു ദിവസങ്ങളായി തുടരുന്ന അതിശക്തമായ മഴയാണ് ഗാസിയാബാദിൽ വ്യാപകമായ നാശനഷ്ടങ്ങൾക്ക് കാരണമായത്.
കഴിഞ്ഞ 24 മണിക്കൂറിനുള്ളിൽ ഗാസിയാബാദിലെ വിവിധയിടങ്ങളിൽ റെക്കോർഡ് മഴയാണ് രേഖപ്പെടുത്തിയത്. കമല നെഹ്റു നഗറിൽ 164 മില്ലീമീറ്ററും ഹിന്ദോനിൽ 134 മില്ലീമീറ്ററും മഴ ലഭിച്ചു. മേഖലയിൽ മഴ തുടരുന്ന സാഹചര്യത്തിൽ ഇന്ത്യൻ കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചിരിക്കുകയാണ്. ആഗ്ര, അലിഗഡ്, മീററ്റ്, ഗൗതം ബുദ്ധ നഗർ തുടങ്ങിയ ഉത്തർപ്രദേശിലെ പ്രധാന ജില്ലകളിൽ ഇടിമിന്നലോട് കൂടിയ ശക്തമായ മഴയ്ക്ക് സാധ്യതയുണ്ടെന്നും മുന്നറിയിപ്പിൽ പറയുന്നു.
Summary: A section of a road in Ghaziabad, Uttar Pradesh, caved in following incessant heavy rains, causing a car and a scooter to plunge into a large pit near a construction site. While no injuries were reported, the incident underscores the severe impact of extreme weather currently affecting the Delhi-NCR region, where authorities have issued an orange alert for further heavy rainfall.
