അനന്തപൂർ: ആന്ധ്രാപ്രദേശിലെ അനന്തപൂരിൽ തിരിച്ചറിയാനാവാത്ത വിധം കത്തിക്കരിഞ്ഞ നിലയിൽ കണ്ടെത്തിയ മൃതദേഹം കേന്ദ്രീകരിച്ച് നടന്ന കൊലപാതകക്കേസ്, സ്ഥലത്തുനിന്ന് ലഭിച്ച ഒരു ചെറിയ തെളിവിലൂടെ പോലീസ് തെളിയിച്ചു (Anantapur Murder Case). മൃതദേഹത്തിന് അരികിൽ നിന്ന് ലഭിച്ച ഒരു പപ്പടം പാക്കറ്റാണ് അന്വേഷണത്തിൽ വഴിത്തിരിവായത്. കർണാടകയിലെ ബല്ലാരി സ്വദേശികളായ ബസവരാജു (31), കോട്രേഷ് (36) എന്നിവരെയാണ് പോലീസ് അറസ്റ്റ് ചെയ്തത്.
ജൂൺ 23-നാണ് അനന്തപൂർ ജില്ലയിലെ പുലകുർത്തി ഗ്രാമത്തിന് സമീപത്തെ കൃഷിയിടത്തിൽ കത്തിക്കരിഞ്ഞ നിലയിൽ മൃതദേഹം കണ്ടെത്തിയത്. ദൃക്സാക്ഷികളോ വ്യക്തമായ തെളിവുകളോ ഇല്ലാത്തതിനാൽ കേസ് അന്വേഷണം ദുഷ്കരമായിരുന്നു. എന്നാൽ ഫോറൻസിക് പരിശോധനയിൽ സ്ഥലത്തുനിന്ന് പാതി കരിഞ്ഞ കന്നഡ പത്രവും കുറച്ചു വസ്ത്രങ്ങളും ഒരു പപ്പടം പാക്കറ്റും ലഭിച്ചു. ഈ പാക്കറ്റിലെ വിവരങ്ങൾ ഉപയോഗിച്ച് പോലീസ് നടത്തിയ അന്വേഷണം അത് നിർമ്മിച്ച കമ്പനിയിലേക്ക് എത്തി. അവിടെനിന്ന് പാക്കറ്റ് വിതരണം ചെയ്ത ബല്ലാരിയിലെ ഡീലറെ കണ്ടെത്തുകയും, ആ പ്രദേശത്ത് നിന്ന് ഗുരുരാജു റാവു എന്ന ഭിന്നശേഷിക്കാരനായ (സംസാരശേഷിയും കേൾവിശക്തിയുമില്ലാത്ത) പപ്പട വ്യാപാരിയെ കാണാതായതായി വിവരം ലഭിക്കുകയും ചെയ്തു.
തുടർന്ന് നടത്തിയ അന്വേഷണത്തിൽ കൊല്ലപ്പെട്ടത് ഗുരുരാജു റാവുവാണെന്ന് സ്ഥിരീകരിച്ചു. ഇയാളുടെ എടിഎം കാർഡ് ഉപയോഗിച്ച് പണം പിൻവലിച്ചതിനെത്തുടർന്ന് ലഭിച്ച സിസിടിവി ദൃശ്യങ്ങൾ പ്രതികളെ പിടികൂടാൻ സഹായിച്ചു. ഭിന്നശേഷിക്കാരനായ വ്യാപാരിക്ക് ബാങ്കിൽ വലിയ തുക സമ്പാദ്യമുണ്ടെന്ന് കരുതിയാണ് പ്രതികൾ ഇയാളെ കൊലപ്പെടുത്തിയത്. പ്രതികളും ഭിന്നശേഷിക്കാരായതിനാൽ ആംഗ്യഭാഷാ വിദഗ്ധരുടെ സഹായത്തോടെയാണ് പോലീസ് ഇവരെ ചോദ്യം ചെയ്തത്. ഇവർ കവർന്ന മോട്ടോർ സൈക്കിൾ, മൊബൈൽ ഫോൺ, എടിഎം കാർഡ് എന്നിവ കണ്ടെടുത്തിട്ടുണ്ട്.
Summary: Anantapur police successfully solved the murder of a deaf and mute man, Gururaju Rao, whose burnt body was found in a field on June 23, by tracing a partially burnt ‘appadam’ (papad) packet found at the crime scene. Investigators followed the packet’s supply chain to Karnataka, and after linking financial activity from the victim’s ATM card to CCTV footage, arrested two men who had targeted the victim for his savings.
