വെള്ള നിറത്തിലൊരു പാമ്പ്; അപൂര്‍വമായ ആല്‍ബിനോ കോബ്രയെ കണ്ടെത്തി
Updated: May 5, 2023, 11:26 IST
കോയമ്പത്തൂര്‍: അപൂര്‍വമായി കാണപ്പെടുന്ന വെള്ള നിറത്തിലുളള മൂര്‍ഖന്‍ പാമ്പിനെ കോയമ്പത്തൂരിലെ പോടന്നൂറില്‍ കണ്ടെത്തി. ചൊവ്വാഴ്ചയാണ് അഞ്ചടിയോളം നീളം വരുന്ന പാമ്പിനെ ആള്‍താമസമുള്ളയിടത്ത് നിന്ന് കണ്ടെത്തിയത്. വൈല്‍ഡ്ലൈഫ് ആന്‍ഡ് നേച്വര്‍ കണ്‍സര്‍വേഷന്‍ ട്രസ്റ്റ് (ഡബ്ല്യുഎന്‍ടിസി) വോളണ്ടിയറായ മോഹനനാണ് പാമ്പിനെ പിടികൂടിയത്. പാമ്പിന്റെ വെളുത്ത നിറത്തിനു പിന്നില്‍ ആൽബിനോ രോഗാവസ്ഥയാണ്.
വെള്ള നിറത്തിലുള്ള മൃഗങ്ങളെയാണ് ആല്‍ബിനോ എന്ന് പേരിലറിയപ്പെടുന്നത്. ജനിതക വ്യതിയാനം മൂലം ശരീരത്തില്‍ മെലാനിന്റെ അളവ് കുറവായതിനാലാണ് പാമ്പുകളുടെ നിറം ഇത്തരത്തില്‍ വെള്ളയാകാനുള്ള പ്രധാന കാരണം. പാമ്പിനെ പിന്നീട് ആനെക്കട്ടി വനമേഖലയില്‍ തുറന്നു വിട്ടു. ജൈവവൈവിധ്യത്താല്‍ സമ്പന്നമായതിനാലാണ് ആനക്കട്ടി മേഖല തിരഞ്ഞെടുത്തതെന്ന് വനംവകുപ്പ് ഉദ്യോഗസ്ഥന്‍ പ്രതികരിച്ചു.
പോടന്നൂര്‍ മേഖലയില്‍ കഴിഞ്ഞ പത്തു വര്‍ഷത്തിനിടെ മൂന്ന് വട്ടമാണ് ആല്‍ബിനോ കോബ്രകളുടെ മാത്രം സാന്നിധ്യം രേഖപ്പെടുത്തിയത്‌. പാമ്പുകളുടെ സ്വാഭാവിക ആവാസവ്യവസ്ഥ നാശം നേരിടുന്നതാണ് പ്രദേശത്ത് പാമ്പുകളെ കൂടുതലായി കാണപ്പെടുന്നതിന് കാരണമായി വന്യജീവി പ്രവര്‍ത്തകര്‍ പറയുന്നത്‌.