ട്വിറ്റര് വഴി തന്റെ തെറ്റു ചൂണ്ടിക്കാട്ടിയ ജീവനക്കാരനെ ട്വിറ്ററിലൂടെ തന്നെ പിരിച്ചുവിട്ടതറിയിച്ച് ഇലോണ് മസ്ക്
![മാധ്യമ കമ്പനിയായ ട്വിറ്റര് സ്വന്തമാക്കിയതിന് പിറകെ ഇലോണ് മസ്ക് കമ്പനി സി ഇ ഒ ഉള്പ്പെടെ ഉന്നതരെ പുറത്താക്കി](https://timeskerala.com/static/c1e/client/91214/uploaded_original/993df5758b78d31eed94ec5329992ede.jpg)
സാന്ഫ്രാന്സിസ്കോ: ട്വിറ്റര് വഴി തന്റെ തെറ്റു ചൂണ്ടിക്കാട്ടിയ ജീവനക്കാരനെ ട്വിറ്ററിലൂടെ തന്നെ പിരിച്ചുവിട്ടതറിയിച്ച് ഇലോണ് മസ്ക്. ട്വിറ്ററിലെ സോഫ്റ്റ്വെയര് പ്രോഗ്രാമുകളുമായി ബന്ധപ്പെട്ട് മസ്ക് പങ്കുവെച്ച ട്വീറ്റിലെ തെറ്റു ചൂണ്ടിക്കാട്ടിയ എന്ജിനീയറെയാണ് ട്വീറ്റിലൂടെ തന്നെ പിരിച്ചുവിട്ടതായി മസ്ക് അറിയിച്ചത്.
![](https://timeskerala.com/static/c1e/static/themes/16/91214/3752/images/New-Creative-.png)
ട്വിറ്ററിന്റെ പ്രവര്ത്തനത്തില് പല രാജ്യങ്ങളിലും സാങ്കേതിക തടസ്സം നേരിടാറുണ്ടെന്നും മോശം സോഫ്റ്റുവെയറുകളാണ് അതിന്റെ കാരണമെന്നും ചൂണ്ടിക്കാട്ടി മസ്ക് കഴിഞ്ഞ ദിവസം ഒരു ട്വീറ്റ് പങ്കുവെച്ചിരുന്നു. അതിലെ സോഫ്റ്റ്വെയര് പ്രോഗാമുകളെ സംബന്ധിച്ച് മസ്ക് നല്കിയ കണക്കുകളില് തെറ്റുണ്ടെന്ന് ട്വിറ്ററിലെ എറിക് ഫ്രോന്ഹോഫര് എന്ന എന്ജിനീയര് ചൂണ്ടിക്കാട്ടിയിരുന്നു. ശരിയായ കണക്കുകള് പറയാനും തകരാര് നേരെയാക്കാന് നിങ്ങള് എന്താണ് ചെയ്തതെന്നുമുള്ള മറു ട്വീറ്റു മസ്കും പങ്കുവെച്ചു.
ചര്ച്ച ചൂടുപിടിച്ചതോടെ എറികിനെ പിരിച്ചു വിട്ടു എന്നറിയിച്ച് മസ്ക് ട്വീറ്റ് ചെയ്യുകയായിരുന്നു. ധാരാളം ആളുകളാണ് മസ്കിന്റെയും എറികിന്റെയും ട്വീറ്റിനു താഴെ മറുപടിയുമായി എത്തിയത്. ഒരു ഭാഗം ആളുകള് എറികിനെ പിന്തുണച്ചപ്പോള് ഇമെയിലായോ സ്വകാര്യ സന്ദേശമായോ വിശദീകരണം നല്കുന്നതായിരുന്നു അനുയോജ്യമെന്ന അഭിപ്രായവുമായി എറികിനെ ഒരു കൂട്ടര് വിമര്ശിക്കുകയും ചെയ്തു.
ട്വിറ്ററിന്റെ മേധാവിത്വം ഏറ്റെടുത്തതു മുതല് മുന്നറിയിപ്പില്ലാതെ ജീവനക്കാരെ പിരിച്ചുവിടുന്ന മസ്കിന്റെ നടപടി വിവാദങ്ങള് സൃഷ്ടിച്ചിരുന്നു. കഴിഞ്ഞ ദിവസം 5000ഓളം ജീവനക്കാരെയാണ് മസ്ക് പിരിച്ചുവിട്ടത്.