കോഴിക്കോട്: വരാനിരിക്കുന്ന കടുത്ത കാലവർഷത്തെ (Monsoon) നേരിടുന്നതിനായി ജില്ല പൂർണ്ണ സജ്ജമാണെന്ന് സംസ്ഥാന റവന്യൂ വകുപ്പ് മന്ത്രി എ.പി അനിൽകുമാർ അറിയിച്ചു (Kerala monsoon preparedness 2026). ജില്ലയിലെ മഴക്കാല മുന്നൊരുക്ക പ്രവർത്തനങ്ങൾ അടിയന്തിരമായി വിലയിരുത്തുന്നതിനായി മന്ത്രിയുടെ നേരിട്ടുള്ള നേതൃത്വത്തിൽ കളക്ടറേറ്റ് കോൺഫറൻസ് ഹാളിൽ ചേർന്ന ഉന്നതതല യോഗത്തിനുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. പ്രകൃതിക്ഷോഭങ്ങൾ ഉണ്ടായാൽ ജനങ്ങളുടെ സുരക്ഷ ഉറപ്പാക്കുന്നതിനും, സർക്കാർ സേവനങ്ങൾ ഏറ്റവും കാര്യക്ഷമമായി അതിവേഗം അവരിലേക്ക് എത്തിക്കുന്നതിനുമാണ് സർക്കാർ പ്രഥമ പരിഗണന നൽകുന്നതെന്ന് മന്ത്രി പറഞ്ഞു. ഇതിനായി വിവിധ വകുപ്പുകളുടെ സജീവമായ സഹകരണവും ഏകോപനവും മന്ത്രി യോഗത്തിൽ ആവശ്യപ്പെട്ടു. മഴക്കാല മുന്നൊരുക്കങ്ങളുടെ ഭാഗമായി മുഖ്യമന്ത്രി വി.ഡി സതീശന്റെ നേതൃത്വത്തിൽ കഴിഞ്ഞ ദിവസം ചേർന്ന സംസ്ഥാനതല യോഗത്തിന്റെ തുടർച്ചയായാണ് ഈ ജില്ലാതല യോഗമെന്നും മന്ത്രി കൂട്ടിച്ചേർത്തു.
ദുരന്തനിവാരണ പ്രവർത്തനങ്ങൾ ഏറ്റവും താഴെത്തട്ട് മുതൽ തുടങ്ങണമെന്നാണ് സർക്കാർ നിർദ്ദേശം. ഏത് അടിയന്തര സാഹചര്യവും നേരിടാൻ വില്ലേജ്, താലൂക്ക് തലം മുതൽ ജില്ലാതലം വരെയുള്ള കൺട്രോൾ റൂമുകളുടെ പ്രവർത്തനങ്ങൾ കൃത്യമായി ഏകോപിപ്പിക്കേണ്ടതുണ്ട്. ഇതിനായി റെവന്യൂ, ആരോഗ്യം, തദ്ദേശസ്വയംഭരണം തുടങ്ങിയ പ്രധാന വകുപ്പുകൾ ഫലപ്രദമായി ഇടപെടണമെന്ന് മന്ത്രി നിർദ്ദേശിച്ചു. കാലവർഷത്തിനൊപ്പം പടർന്നുപിടിക്കാൻ സാധ്യതയുള്ള പകര്ച്ചവ്യാധികള് നേരിടുന്നതിനായി ആരോഗ്യവകുപ്പ് പ്രത്യേക ജാഗ്രതയും മുൻകരുതലും സ്വീകരിക്കണം. സർക്കാർ ആശുപത്രികളിൽ ആവശ്യത്തിന് മരുന്നും മറ്റ് ജീവൻരക്ഷാ സജ്ജീകരണങ്ങളും ഉണ്ടെന്ന് മന്ത്രി യോഗത്തിൽ ഉറപ്പാക്കി.
പുതിയ അധ്യയനവർഷം ആരംഭിക്കുന്നതിനാൽ മഴക്കാലത്ത് സ്കൂളുകളിൽ പ്രത്യേക ജാഗ്രത ആവശ്യമാണ്. സ്കൂൾ കെട്ടിടങ്ങളുടെ ഫിറ്റ്നസ് (Fitness Certificate) സംബന്ധിച്ച കാര്യങ്ങളും അപകടാവസ്ഥയിലുള്ള മരങ്ങൾ മുറിച്ചുമാറ്റുന്നതും മന്ത്രി അവലോകനം ചെയ്തു. നഗര-ഗ്രാമ വ്യത്യാസമില്ലാതെ ഓടകൾ വൃത്തിയാക്കുന്നതുൾപ്പെടെയുള്ള മഴക്കാലപൂർവ ശുചീകരണ പ്രവർത്തനങ്ങൾ, ദുരിതാശ്വാസ ക്യാമ്പുകളിലെ അടിസ്ഥാന സജ്ജീകരണങ്ങൾ, തീരദേശങ്ങളിൽ കടൽക്ഷോഭം നേരിടുന്നതിനുള്ള മുന്നൊരുക്കങ്ങൾ, കടലിൽ പോകുന്ന മത്സ്യത്തൊഴിലാളികളുടെ സുരക്ഷ തുടങ്ങി സുപ്രധാന വിഷയങ്ങൾ മന്ത്രി വിശദമായി വിലയിരുത്തി.
യോഗത്തിൽ ജില്ലാ കളക്ടർ എം.എസ് മാധവിക്കുട്ടി അധ്യക്ഷത വഹിച്ചു. കാലവർഷത്തെ നേരിടാൻ ജില്ലയിൽ വിവിധ വകുപ്പുകൾ ഇതിനകം നടത്തിപ്പോരുന്ന പ്രവർത്തനങ്ങളെക്കുറിച്ച് കളക്ടർ വിശദീകരിച്ചു. റെവന്യൂ, ആരോഗ്യം, പോലീസ്, അഗ്നിരക്ഷാസേന, തദ്ദേശവകുപ്പ്, വനം, പൊതുവിദ്യാഭ്യാസം, കെ.എസ്.ഇ.ബി, ഫിഷറീസ്, കോർപ്പറേഷൻ, വാട്ടർ അതോറിറ്റി, മേജർ-മൈനർ ഇറിഗേഷൻ, മോട്ടോർ വാഹനം തുടങ്ങിയ വകുപ്പുകൾ തങ്ങൾ നടത്തിയ മുന്നൊരുക്കങ്ങൾ യോഗത്തിൽ വിശദീകരിക്കുകയും അവർ നേരിടുന്ന സാങ്കേതിക പ്രശ്നങ്ങളും പ്രതിസന്ധികളും ചർച്ച ചെയ്യുകയും ചെയ്തു.
യോഗത്തിൽ സബ് കളക്ടർ എസ്. ഗൗതം രാജ്, സിറ്റി പോലീസ് കമ്മീഷണർ മെറിൻ ജോസഫ്, റൂറൽ എസ്.പി ടി. ഫറാഷ്, എ.ഡി.എം പി. അഖിൽ, അസിസ്റ്റന്റ് കളക്ടർ മാളവിക ജി. നായർ, ദുരന്തനിവാരണം ഡെപ്യൂട്ടി കളക്ടർ എം. സാജിദ്, വിവിധ വകുപ്പുതല ഉന്നത ഉദ്യോഗസ്ഥർ തുടങ്ങിയവർ പങ്കെടുത്തു.
Story Summary: Revenue Minister AP Anilkumar announced that the district is fully prepared for the monsoon season during a review meeting held at the Collectorate. He emphasized public safety and inter-departmental coordination, tracking tasks from grassroots levels, disease prevention, and school building fitness.
