കോഴിക്കോട്ടെ ജനവാസമേഖലയില്‍ ഭീതി പടർത്തി ഒറ്റയാന്‍
കോഴിക്കോട്: വലങ്ങാട് മലയങ്ങാട് ജനവാസമേഖലയില്‍ ഒറ്റയാന്‍ ഇറങ്ങി ജനങ്ങൾക്കിടയിൽ ഭീതി പടർത്തി. രാവിലെ ഏഴോടെയാണ് ഇവിടെ ആന എത്തുന്നത്. നിലവില്‍ കാട്ടാന പ്രദേശത്തെ ഒരു കൃഷിസ്ഥലത്ത് നിലയുറപ്പിച്ചിരിക്കുകയാണ്. ആദ്യം ഒരു കടയുടെ സമീപമെത്തിയ ആന പിന്നീട് റോഡിലൂടെ നടന്ന് കൃഷി സ്ഥലത്തേക്ക് നീങ്ങുകയായിരുന്നു. വിവരം അറിഞ്ഞ് വനംവകുപ്പ് അധികൃതര്‍ എത്തിയിട്ടുണ്ട്.
വന്യമൃഗശല്യം കാരണം ഇവിടെ വൈദ്യുതവേലി സ്ഥാപിക്കണമെന്ന് പലതവണ ആവശ്യപ്പെട്ടെങ്കിലും നടപടിയുണ്ടായില്ലെന്ന് നാട്ടുകാര്‍ ആരോപിച്ചു. ഇതോടെ ഇവിടെ കാട്ടാന ഇറങ്ങുന്നത് പതിവ് സംഭവമാണെന്നും പ്രദേശവാസികള്‍ പറഞ്ഞു.