നാല് വയസുകാരിക്ക് കൈവിരലിനു പകരം നാവില്‍ ശസ്ത്രക്രിയ നടത്തിയ സംഭവത്തിൽ ആരോഗ്യവകുപ്പുമന്ത്രി അടിയന്തര റിപ്പോര്‍ട്ട് തേടി
May 16, 2024, 15:39 IST
കോഴിക്കോട്: വിരലിന് ശസ്ത്രക്രിയ ചെയ്യാനെത്തിയ നാലു വയസുകാരിക്ക് ശസ്ത്രക്രിയ നടത്തിയത് നാവിൽ. ഇന്ന് രാവിലെയുണ്ടായ സംഭവത്തിൽ ശസ്ത്രക്രിയ മാറി ചെയ്തത് കോഴിക്കോട് ചെറുവണ്ണൂര്‍ മധുര ബസാര്‍ സ്വദേശിനിയായ ആയിഷ റുവയ്ക്കാണ്. ആരോഗ്യവകുപ്പ് മന്ത്രി വീണാ ജോർജ്ജ് പരാതിയിൽ അടിയന്തരമായി അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ മെഡിക്കല്‍ വിദ്യാഭ്യാസ ഡയറക്ടര്‍ക്ക് നിര്‍ദേശം നല്‍കി. കുട്ടിക്ക് നടത്തേണ്ടിയിരുന്നത് കൈയിലെ ആറാംവിരല്‍ നീക്കം ചെയ്യാനുള്ള ശസ്ത്രക്രിയയായിരുന്നുവെങ്കിലും നടത്തിയത് നാവിലാണ്. തുടർന്ന് പ്രതിഷേധമുണ്ടാവുകയും കുട്ടിയുടെ ആറാം വിരൽ അരമണിക്കൂറിനുള്ളിൽ മറ്റൊരു ശസ്ത്രക്രിയയിലൂടെ നീക്കം ചെയ്യുകയും ചെയ്തു. മെഡിക്കൽ കോളജിലെ മാതൃ ശിശു സംരക്ഷണ കേന്ദ്രത്തിലാണ് ഈ ഗുരുതര ചികിത്സാപ്പിഴവ്.