വയനാട്: കള്ളാടി മണ്ണിടിച്ചിൽ ദുരന്തസ്ഥലത്തുനിന്നും നാല് മൃതദേഹങ്ങൾ കൂടി കണ്ടെടുത്തു. ഇതോടെ ദുരന്തത്തിൽ മരിച്ചവരുടെ എണ്ണം ഏഴായി ഉയർന്നു. സർവേയറായ ഉത്തരപ്രദേശ് സ്വദേശി അസ്ഹറുദ്ദീൻ അൻസാരി, ഹിമാചൽ പ്രദേശ് സ്വദേശിയായ എൻജിനീയർ രാഹുൽ ശർമ്മ, ബിഹാർ സ്വദേശിയായ എസ്കവേറ്റർ ഓപ്പറേറ്റർ മുഹമ്മദ് ഇമ്രാൻ എന്നിവരുടേതുൾപ്പെടെയുള്ള മൃതദേഹങ്ങളാണ് വ്യാഴാഴ്ച രാവിലെ നടത്തിയ തിരച്ചിലിൽ കണ്ടെത്തിയത്.(Wayanad Kalladi Landslide, Four More Bodies Recovered)
മൃതദേഹങ്ങൾ വൈത്തിരി താലൂക്ക് ആശുപത്രിയിൽ പോസ്റ്റ്മോർട്ടം നടപടികൾ പൂർത്തിയാക്കിയ ശേഷം എംബാമിങ്ങിനായി കോഴിക്കോട് മെഡിക്കൽ കോളേജിലേക്ക് കൊണ്ടുപോകും. തുടർന്ന് ജന്മനാടുകളിലേക്ക് അയക്കുമെന്ന് അധികൃതർ അറിയിച്ചു. മീനാക്ഷി പാലത്തിന്റെ താഴെ വലതുഭാഗത്തുനിന്നും പുഴയിൽ നിന്നുമാണ് മൃതദേഹങ്ങൾ കണ്ടെടുത്തതെന്ന് സ്ഥലത്ത് ക്യാമ്പ് ചെയ്യുന്ന മന്ത്രി എ.പി. അനിൽകുമാർ പറഞ്ഞു.
പൈപ്പുകളുടെയും വാഹനഭാഗങ്ങളുടെയും ഇടയിൽ മണ്ണുമൂടിയ നിലയിലായിരുന്നു മൃതദേഹങ്ങൾ. നിലവിൽ ദുരന്തബാധിത പ്രദേശം നാല് സോണുകളായി തിരിച്ചാണ് മൂന്നാം ദിവസത്തെ തിരച്ചിൽ പുരോഗമിക്കുന്നത്. കൂടുതൽ മൃതദേഹങ്ങൾ ഉണ്ടാകാൻ സാധ്യതയുണ്ടെന്ന് കരുതുന്ന ഒന്നാം സോണിലും രണ്ടാം സോണിലുമാണ് ഇന്ന് പ്രധാനമായും പരിശോധന നടത്തുന്നത്. മീനാക്ഷി പുഴയിലും തിരച്ചിൽ ശക്തമാക്കിയിട്ടുണ്ട്. മൃതദേഹങ്ങൾ തിരിച്ചറിയാൻ പ്രയാസമുണ്ടെങ്കിൽ മാത്രം ഡി.എൻ.എ ടെസ്റ്റ് നടത്തിയാൽ മതിയാകുമെന്നാണ് മെഡിക്കൽ സംഘത്തിന്റെ വിലയിരുത്തൽ.
കഡാവർ നായകളെ ഉൾപ്പെടുത്തിയാണ് മൂന്നാം ഘട്ട പരിശോധന നടത്തുന്നത്. എന്നാൽ ബുധനാഴ്ച രാത്രി മുതൽ പ്രദേശത്ത് തുടരുന്ന ശക്തമായ മഴയും പുഴയിലെ ശക്തമായ ഒഴുക്കും തിരച്ചിൽ നടപടികൾക്ക് വലിയ പ്രതിസന്ധി സൃഷ്ടിക്കുന്നുണ്ട്. മന്ത്രിമാരായ ടി. സിദ്ദിഖ്, എ.പി. അനിൽകുമാർ എന്നിവർ രക്ഷാപ്രവർത്തനങ്ങൾക്ക് നേതൃത്വം നൽകാൻ ജില്ലയിൽ തുടരുകയാണ്. ദുരന്തത്തെക്കുറിച്ച് ശാസ്ത്രീയമായി അന്വേഷിക്കാനുള്ള പ്രത്യേക സമിതിക്ക് ഇന്ന് രൂപം നൽകും.
Story Summary
The death toll in the Kalladi landslide rose to seven after rescuers recovered four more bodies, including those of Azharuddin Ansari (UP), Rahul Sharma (HP), and Mohammad Imran (Bihar). Minister A.P. Anilkumar stated that the search operation across four zones is facing severe challenges due to heavy rains and strong river currents, while a special probe panel is being formed today.
