തെരുവ് വിളക്കിന്‍റെ ബാറ്ററി മോഷ്ടിക്കുന്ന യുവാക്കള്‍ പിടിയിൽ
Fri, 17 Mar 2023
തിരുവല്ല: എം.സി റോഡിൽ അടക്കം തെരുവ് വിളക്കുകളുടെ ബാറ്ററികൾ മോഷ്ടിച്ച കേസിൽ നാല് യുവാക്കളെ തിരുവല്ല പോലീസ് പിടികൂടി. പെരിങ്ങര പെരുന്തുരുത്തി താഴ്ചത്തറയില്‍ അജു പോള്‍ (21), അഖില്‍ ബാബു(23), ആലംതുരുത്തി പാലക്കുഴിയില്‍ ഷാജു (23), കാരണത്തുശ്ശേരിയില്‍ അനൂപ് വര്‍ഗീസ് (30) എന്നിവരെയാണ് പിടികൂടിയത്. കഴിഞ്ഞ ഒന്‍പതിന് രാത്രി ഒരുമണിക്കും നാലിനും ഇടയിലായിരുന്നു കവര്‍ച്ച. വഞ്ചിമൂട്ടില്‍പ്പടി, മടിക്കോലിപ്പടി, തെങ്ങേലി ഈരടിച്ചിറ, മണിമന്ദിരം എന്നിവിടങ്ങളിലെ തെരുവ് വിളക്കുകളിലെ സോളാര്‍ ബാറ്ററിയാണ് കവര്‍ന്നത്. ഇവര്‍ വാഹനത്തില്‍ പോകുന്ന ദൃശ്യങ്ങള്‍ സി.സി.ടി.വിയിൽ പതിഞ്ഞിരുന്നു. സഞ്ചരിച്ച വാഹനത്തിന്‍റെ നമ്പര്‍ അടിസ്ഥാനമാക്കിയുള്ള അന്വേഷണത്തിലാണ് പ്രതികളെ കണ്ടെത്തിയത്. മോഷ്ടിക്കുന്ന ബാറ്ററി പെരിങ്ങരയിലെ ആക്രിക്കടയിലാണ് സംഘം വിൽപന നടത്തിയിരുന്നത്. ഇവ പൊലീസ് കണ്ടെടുത്തിട്ടുണ്ട്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.