തോപ്പുംപടി കൊലപാതകം; പ്രതി പിടിയില്‍
കൊച്ചി: തോപ്പുംപടിയില്‍ കടയില്‍ കയറി യുവാവിനെ കുത്തിക്കൊലപ്പെടുത്തിയ സംഭവത്തിലെ പ്രതി പിടിയില്‍. കൊല്ലപ്പെട്ട ബിനോയ് സ്റ്റാന്‍ലിയുടെ അയല്‍വാസിയായ അലനാണ് പിടിയിലായത്.
തോപ്പുംപടിയിലെ ഒരു ഉള്‍പ്രദേശത്തുനിന്നാണ് ഇയാളെ കസ്റ്റഡിയിലെടുത്തത്. നേരത്തേ പല വിഷയങ്ങളിലായുണ്ടായ മുന്‍വൈരാഗ്യമാണ് കൊലപാതകത്തിൽ കലാശിച്ചതെന്ന് പോലീസ് അറിയിച്ചു. ബുധനാഴ്ച രാത്രി 7:45ന് സൗദി സെന്‍റ് ആന്‍റണീസ് എൽപി സ്കൂളിന് സമീപമുള്ള കടയിലാണ് സംഭവം നടന്നത്. കടയില്‍ ആരുമില്ലാത്ത സമയത്ത് ഇവിടെയെത്തിയ പ്രതി ബിനോയിയുമായി വാക്ക് തര്‍ക്കത്തില്‍ ഏർപ്പെടുകയും ഇതിനിടെ കൈയില്‍ കരുതിയിരുന്ന കത്തി ഉപയോഗിച്ച് പലതവണ കുത്തുകയുമായിരുന്നു.
സംഭവത്തിന് പിന്നാലെ അലന്‍ ഓടി രക്ഷപെട്ടു. പിന്നാലെ ഇവിടെയെത്തിയ ആളുകളാണ് ബിനോയിയെ കുത്തേറ്റ നിലയില്‍ കണ്ടെത്തിയത്. ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരിച്ചു. സംഭവത്തിന്‍റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്.