പച്ചക്കറിക്കടയില്‍ മോഷണം; ഉണക്കമീന്‍ മുതല്‍ മണ്‍കലം വരെ കടത്തി
കുളത്തൂപ്പുഴ: അടിച്ചിട്ടിരുന്ന പച്ചക്കറിക്കടയില്‍ നിന്ന് ഉണക്കമീനും ചട്ടിക്കലവും ഉൾപ്പടെ അപഹരിച്ചു. കുളത്തൂപ്പുഴ കെ.എസ്.ആര്‍.ടി.സി കവലയില്‍ അന്തർ സംസ്ഥാന പാതയില്‍ നിന്ന് ഡിപ്പോ റോഡിലേക്ക് പ്രവേശിക്കുന്ന ഭാഗത്തുള്ള കബീറിന്‍റെ പച്ചക്കറി കടയിലാണ് ഞായറാഴ്ച രാത്രി മോഷണം നടന്നത്. വര്‍ഷങ്ങളായി പാതയോരം വാടകക്കെടുത്തു ഷെഡ്കെട്ടി ടാര്‍പ്പാളില്‍ കൊണ്ട് മറച്ചുകെട്ടിയാണ് കബീറും കുടംബവും പച്ചക്കറി വ്യാപാരം നടത്തിവരുന്നത്.
രാവിലെ കട തുറക്കാന്‍ എത്തിയപ്പോഴാണ് വിവരം അറിയുന്നത്. വാഴക്കുല, ഉണക്കമീന്‍, ചെമ്മീന്പൊടി, കാപ്പിപൊടി, മുന്തിരിങ്ങ, മാങ്ങ, മണ്‍കലങ്ങള്‍, വൈദ്യുതി ഇല്ലാത്തതിനാല്‍ രാത്രിയില്‍ കടയില്‍ പ്രകാശത്തിനായി ഉപയോഗിച്ചിരുന്ന വാഹന ബാറ്ററി എന്നിവയെല്ലാം കടത്തി. പണപ്പെട്ടിയിലുണ്ടായിരുന്ന ചില്ലറ തുട്ടുകളും നഷ്ടമായി.