കോണ്‍ഗ്രസ് മുന്‍ എംഎല്‍എമാര്‍ക്കെതിരായ കേസ് രാഷ്ട്രീയ പ്രേരിതമെന്ന് വി.ഡി. സതീശന്‍
തിരുവനന്തപുരം: നിയമസഭാ കയ്യാങ്കളി കേസില്‍ മുന്‍ കോണ്‍ഗ്രസ് എം.എല്‍.എ മാര്‍ക്കെതിരെ പ്രത്യേക കേസെടുക്കാനുള്ള തീരുമാനം രാഷ്ട്രീയ പ്രേരിതമെന്ന് പ്രതിപക്ഷ നേതാവ് വി.ഡി. സതീശന്‍. സര്‍ക്കാരിന് ദുഷ്ടലാക്കെന്നും കേസിനെതിരേ ഏതറ്റം വരെയും പോകുമെന്നും സതീശന്‍ പറഞ്ഞു.
ഇടത് വനിതാ എംഎല്‍എമാരെ തടഞ്ഞു വച്ച് കൈയേറ്റം ചെയ്തുവെന്ന പരാതിയിൽ എംഎ വാഹിദ്, ശിവദാസന്‍ നായര്‍ എന്നിവര്‍ അടക്കം പ്രതികളാകും. മുന്‍ വനിതാ എംഎല്‍എമാരാണ് കേസില്‍ പരാതിക്കാര്‍. തിരുവനന്തപുരം മ്യൂസിയം പോലീസാണ് കോണ്‍ഗ്രസ് മുന്‍ എംഎല്‍എമാര്‍ക്കെതിരേ പ്രത്യേകം കേസെടുക്കുക. പുതിയ കേസെടുക്കുന്ന കാര്യം ഈ മാസം 21ന് ക്രൈം ബ്രാഞ്ച് ചീഫ് ജുഡീഷ്യല്‍ മജിസ്‌ട്രേറ്റ് കോടതിയെ അറിയിക്കും. കോണ്‍ഗ്രസ് എംഎല്‍എമാരെ പ്രതി ചേര്‍ത്തായിരുന്നു അന്വേഷണ സംഘം ക്രൈം ബ്രാഞ്ച് മേധാവിക്ക് റിപ്പോര്‍ട്ട് നല്‍കിയത്. ഇതില്‍ നിയമോപദേശം തേടിയപ്പോഴാണ് പ്രത്യേക കേസെടുക്കാന്‍ നിര്‍ദ്ദേശം ലഭിച്ചത്.