വഴിത്തർക്കം: കൊലപാതകശ്രമത്തിൽ പിതാവും മകനും അറസ്റ്റിൽ
![വഴിത്തർക്കം: കൊലപാതകശ്രമത്തിൽ പിതാവും മകനും അറസ്റ്റിൽ](https://timeskerala.com/static/c1e/client/91214/uploaded/7c681cb4ad327b454b8acb4c61555cd9.gif)
കടയ്ക്കൽ: വഴിത്തർക്കത്തെ തുടർന്ന് അയൽവാസികളെ വെട്ടിക്കൊലപ്പെടുത്താൻ ശ്രമിച്ച സംഭവത്തിൽ പിതാവും മകനും അറസ്റ്റിൽ. ചിതറ മതിര തോട്ടുമുക്ക് ആനന്ദഭവനിൽ സോമൻ (70), മകൻ ആനന്ദ് (35) എന്നിവരെയാണ് ചിതറ പൊലീസ് അറസ്റ്റ് ചെയ്തത്.
തിങ്കളാഴ്ച ഉച്ചക്കായിരുന്നു കേസിനാസ്പദമായ സംഭവം നടന്നത്. മതിര തോട്ടുമുക്ക് മംഗലത്ത് പുത്തൻവീട്ടിൽ ഷിജു (37), തോട്ടുമുക്ക് വിനയം വീട്ടിൽ വിനീത (30) എന്നിവരെയാണ് അയൽവാസികളായ പിതാവും മകനും വാളുകൊണ്ട് വെട്ടിയത്. കഴിഞ്ഞദിവസം ഷിജുവിന്റെ സഹോദരിയുടെ മകളുടെ വിവാഹ ചടങ്ങുകൾക്കായി വീട്ടുകാർ പോയ സമയത്ത് സോമനും മകൻ ആനന്ദും ചേർന്ന് തർക്കം നിലനിന്നിരുന്ന വഴിയിൽനിന്ന എല്ലാ മരങ്ങളും വെട്ടിമാറ്റി. ഇതുസംബന്ധിച്ച് പൊലീസിൽ പരാതി നൽകിയതിനെ തുടർന്നാണ് ഇരുവരും വാളുമായി വീട്ടിലേക്ക് അതിക്രമിച്ച് കയറി ഷിജുവിനെ തലയിലും ശരീരത്തും വെട്ടിയത്. സാരമായി പരിക്കേറ്റ ഇരുവരേയും തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. സംഭവം കണ്ട് തടസ്സം പിടിക്കാനെത്തിയ അയൽവാസി വിനീതക്കും വെട്ടേറ്റു.
![](https://timeskerala.com/static/c1e/static/themes/16/91214/3752/images/New-Creative-.png)