കൊച്ചി: താരസംഘടനയായ ‘അമ്മ’ (AMMA) ക്കുള്ളിൽ നിലനിൽക്കുന്ന ആഭ്യന്തര തർക്കങ്ങളെക്കുറിച്ചും കൂട്ടരാജികളെക്കുറിച്ചും തുറന്നുപറഞ്ഞ് നടനും സംവിധായകനുമായ പൃഥ്വിരാജ് സുകുമാരൻ (Prithviraj Sukumaran AMMA association dispute). തന്റെ ഏറ്റവും പുതിയ ചിത്രമായ ‘ഐ നോബഡി’ (I Nobody) എന്ന സിനിമയുടെ പ്രസ് മീറ്റിൽ പങ്കെടുക്കവെയാണ് താരം മാധ്യമങ്ങളുടെ ചോദ്യങ്ങൾക്ക് മറുപടി നൽകിയത്. അതേസമയം, സംഘടനയിലെ പ്രശ്നങ്ങളോട് ഇപ്പോൾ പ്രതികരിക്കാനില്ലെന്ന് പ്രസ് മീറ്റിൽ പങ്കെടുത്ത നടി പാർവതി തിരുവോത്തും വ്യക്തമാക്കി.
സിനിമയുടെ പ്രൊമോഷൻ വേദികളിലെത്തുമ്പോൾ ചിത്രത്തിന് പ്രാധാന്യം നൽകാതെ സംഘടനയിലെ വിവാദങ്ങൾക്ക് പിന്നാലെ പോകുന്ന മാധ്യമശൈലിയെ പൃഥ്വിരാജ് സൌമ്യമായി വിമർശിച്ചു.
“അമ്മയിൽ കുറച്ച് പ്രശ്നങ്ങളൊക്കെ നടന്നുകൊണ്ടിരിക്കുന്ന സമയമാണ്. നമ്മളെല്ലാം വാർത്തകൾ കാണുന്നുണ്ട്. ശരിക്കും ഈ പ്രസ് മീറ്റിൽ സിനിമയെക്കുറിച്ചുള്ള ചോദ്യങ്ങൾ മാത്രം ചോദിക്കണമെന്ന് അഭ്യർത്ഥിക്കുന്നതിന് വലിയൊരു കാരണമുണ്ട്. ഞങ്ങളെല്ലാം സമയം കണ്ടെത്തി ഇവിടെയെത്തിയത് ഈ സിനിമയുടെ പ്രൊമോഷന് വേണ്ടിയാണ്. നിങ്ങളും പല തിരക്കുകൾക്കിടയിൽ ഇവിടെ വന്നത് ഞങ്ങളുടെ അഭ്യർത്ഥന മാനിച്ചാണ്.
ഞാനിപ്പോൾ ഈ ചോദ്യത്തിന് ഉത്തരം പറഞ്ഞാൽ, ഇന്നത്തെ പ്രസ് മീറ്റിന്റെ ആദ്യത്തെ ആർട്ടിക്കിൾ ‘അമ്മ സംഘടനയുടെ പ്രശ്നങ്ങളെക്കുറിച്ച് പൃഥ്വിരാജ് പറഞ്ഞത്’ എന്നായിരിക്കും. അതിന്റെ താഴെ എവിടെയെങ്കിലും മാത്രമായിരിക്കും സിനിമയുടെ പേരുണ്ടാകുക. പിന്നെ ഞങ്ങൾ ഈ പ്രസ് മീറ്റ് നടത്തുന്നതുകൊണ്ട് എന്താണ് ഗുണം? അതുകൊണ്ട് ‘ഐ നോബഡി’യെക്കുറിച്ച് ആദ്യം എഴുതിയിട്ട്, അതിന് താഴെ എന്റെ ഈ മറുപടി നൽകണം എന്നാണ് അപേക്ഷ,” പൃഥ്വിരാജ് പറഞ്ഞു.
സംഘടനയിലെ പ്രതിസന്ധിയെക്കുറിച്ച് പൃഥ്വിരാജ് പറഞ്ഞത്:
സംഘടനയിൽ അംഗങ്ങൾക്കിടയിൽ ആശയപരമായും അല്ലാതെയും വലിയ തർക്കങ്ങൾ നടക്കുന്നുണ്ടെന്നത് യാഥാർത്ഥ്യമാണെന്ന് പൃഥ്വിരാജ് സമ്മതിച്ചു. സംഘടനയ്ക്കുള്ളിൽ രമ്യമായ പരിഹാരം കണ്ടെത്താൻ സാധിക്കാത്തതിനാലാണ് കുറച്ചധികം അംഗങ്ങൾ തങ്ങളുടെ ഭാരവാഹിത്വവും അംഗത്വവും രാജിവെച്ചതെന്നും അദ്ദേഹം കൂട്ടിച്ചേർത്തു.
ഒരു പൊതുയോഗം (ജനറൽ ബോഡി) വിളിച്ചുചേർത്ത് പ്രശ്നപരിഹാരത്തിന് ശ്രമിച്ചെങ്കിലും അത് സാധ്യമാകാത്ത സാഹചര്യത്തിലാണ് കുറച്ചുപേർ രാജിവെച്ചുപോയത്. നിലവിൽ സംഘടനയുടെ മുന്നോട്ടുള്ള പ്രവർത്തനങ്ങൾക്കായി ഒരു താൽക്കാലിക അഡ്ഹോക്ക് (Ad-hoc) കമ്മിറ്റിയെ ചുമതലപ്പെടുത്തിയിട്ടുണ്ട്. പ്രശ്നങ്ങൾ പരിഹരിക്കാനുള്ള പ്രക്രിയകൾ അവർ ആരംഭിച്ചുകഴിഞ്ഞു. ഒരു സിനിമാ പ്രവർത്തകൻ എന്ന നിലയിലും ആ സംഘടനയിലെ അംഗം എന്ന നിലയിലും എത്രയും പെട്ടെന്ന് പ്രശ്നങ്ങൾക്ക് പരിഹാരമുണ്ടാകാനും, അംഗങ്ങളുടെ സംശയങ്ങൾക്ക് മറുപടി ലഭിക്കാനും സാധിക്കട്ടെ എന്നാണ് താൻ ആഗ്രഹിക്കുന്നതെന്നും പൃഥ്വിരാജ് വ്യക്തമാക്കി.
Story Summary:
During the press meet for his upcoming film ‘I Nobody’, actor Prithviraj Sukumaran addressed the ongoing internal conflicts within the actors’ association, AMMA. While urging the media to prioritize the movie over controversies, he expressed hope that the newly appointed ad-hoc committee would resolve the issues swiftly.
