മലയാളികളുടെ പ്രിയപ്പെട്ട ആനവണ്ടിയും അതിലെ സ്ത്രീകളുടെ സൗജന്യ യാത്രയും പ്രമേയമാക്കി പുതിയ സിനിമയുമായി സംവിധായകനും നടനുമായ സന്തോഷ് പണ്ഡിറ്റ് (Santhosh Pandit). ‘ആനവണ്ടിയിലെ ആറു പെണ്ണുങ്ങള്’ എന്ന് പേരിട്ടിരിക്കുന്ന ചിത്രത്തിന്റെ പൂർണ്ണമായ കഥാതന്തു സന്തോഷ് പണ്ഡിറ്റ് തന്നെയാണ് തന്റെ ഫേസ്ബുക്ക് പേജിലൂടെ ആരാധകർക്കായി പങ്കുവെച്ചത്. പതിവുപോലെ സോഷ്യൽ മീഡിയയിൽ വലിയ ചർച്ചകൾക്കാണ് ഈ പോസ്റ്റ് വഴിതുറന്നിരിക്കുന്നത്. കഥ പ്രേക്ഷകർക്ക് ഇഷ്ടമായാൽ താൻ തന്നെ ചിത്രത്തിൽ അഭിനയിച്ച് സംവിധാനം ചെയ്യാമെന്നാണ് പണ്ഡിറ്റിന്റെ പ്രഖ്യാപനം.
വ്യത്യസ്ത പശ്ചാത്തലങ്ങളിൽ നിന്നുള്ള, ജീവിതം മടുത്ത ആറ് യുവതികളുടെ കഥയാണ് സിനിമയുടെ കാതൽ. കാസർഗോഡ് ജില്ലയിലെ ഒരു ഉൾഗ്രാമത്തിൽ നിന്ന് സോഷ്യൽ മീഡിയ വഴി സൗഹൃദത്തിലാകുന്ന ആറ് പെൺകുട്ടികൾ, കെഎസ്ആർടിസിയുടെ പ്രിയദർശിനി ബസ്സിൽ (സ്ത്രീകൾക്ക് സൗജന്യ യാത്രയുള്ള ബസ്) പണമൊന്നുമില്ലാതെ കേരളം മുഴുവൻ ചുറ്റിക്കറങ്ങാൻ തീരുമാനിക്കുന്നതാണ് കഥയുടെ തുടക്കം. വീട്ടുകാരെ അറിയിക്കാതെ യാത്ര തിരിക്കുന്ന ഇവർക്ക് മുന്നിലേക്ക് രക്ഷകനായി 29-ര വയസ്സുകാരനായ മനോഹർ പണ്ഡിറ്റ് എന്ന കെഎസ്ആർടിസി ടിക്കറ്റ് ചെക്കിങ് ഇൻസ്പെക്ടർ എത്തുന്നു. ഈ പ്രധാന കഥാപാത്രത്തെയാണ് സന്തോഷ് പണ്ഡിറ്റ് അവതരിപ്പിക്കുന്നത്.
തുടർന്ന് ഈ ആറ് യുവതികൾക്ക് കുറഞ്ഞ ചിലവിൽ കേരളം മുഴുവൻ ചുറ്റിക്കറങ്ങാനുള്ള കിടിലൻ ഐഡിയകൾ പണ്ഡിറ്റ് ഉപദേശിച്ചു നൽകുന്നു. സ്വന്തം കയ്യിൽ നിന്ന് പണം മുടക്കി അവർക്ക് താമസവും ഭക്ഷണവും വസ്ത്രങ്ങളും വാങ്ങി നൽകി 15 ദിവസം കൊണ്ട് കേരളം മുഴുവൻ കാണിച്ചു കൊടുക്കുന്ന പണ്ഡിറ്റിനോട് ഒടുവിൽ പെൺകുട്ടികൾക്ക് പ്രണയവും ബഹുമാനവും തോന്നുന്നു. തുടർന്ന് രണ്ട് വർഷങ്ങൾക്ക് ശേഷം ഇവരുടെ ജീവിതത്തിലുണ്ടാകുന്ന നാടകീയമായ മാറ്റങ്ങളും, കെഎസ്ആർടിസിയുടെ പ്രതിസന്ധികളും, സ്വകാര്യ ബസ് മേഖലയിലെ തകർച്ചയുമെല്ലാം ചിത്രത്തിൽ പ്രതിപാദിക്കുന്നുണ്ട്.
എട്ട് പ്രണയഗാനങ്ങൾ ഉൾപ്പെടുത്തിയിട്ടുള്ള ഈ സിനിമയുടെ ക്ലൈമാക്സ് പണ്ഡിറ്റിന്റെ നർമ്മം കലർന്ന ഡയലോഗിലൂടെയാണ് അവസാനിക്കുന്നത്. സന്തോഷ് പണ്ഡിറ്റിന്റെ ഈ പോസ്റ്റ് പ്രത്യക്ഷപ്പെട്ടതോടെ സോഷ്യൽ മീഡിയയിൽ കമന്റുകളുടെ പൂരമാണ്. “ബോളിവുഡിനെ വെല്ലുന്ന പാൻ ഇന്ത്യൻ കഥ”, “സിനിമയിലെ കഥാപാത്രങ്ങളുടെ പേരെല്ലാം കപൂർ ഫാമിലിയിലുള്ളതാണല്ലോ”, “എല്ലാവരും ഹിന്ദിക്കാരാണോ, മലയാളിയായി ഞാനും പോരട്ടെ” എന്നിങ്ങനെ രസകരമായ പ്രതികരണങ്ങളാണ് പോസ്റ്റിന് താഴെ ആരാധകർ പങ്കുവെക്കുന്നത്.
Story Summary: Santhosh Pandit announced his upcoming movie titled ‘Anavandiyile Aru Pennungal’ based on the theme of free KSRTC bus travel for women. He shared the entire script layout on Facebook, asking fans for feedback to feature and direct the film.
