കൊച്ചി: ‘റോഷാക്കി’ന് ശേഷം നിസാം ബഷീർ സംവിധാനം ചെയ്യുന്ന പൃഥ്വിരാജ് ചിത്രം ‘ഐ നോബഡി’യുടെ ടീസർ പുറത്തിറങ്ങി (I Nobody Movie Teaser). പൃഥ്വിരാജ് സുകുമാരൻ, പാർവതി തിരുവോത്ത്, ഹക്കിം ഷാജഹാൻ എന്നിവർ പ്രധാന വേഷങ്ങളിലെത്തുന്ന ചിത്രം ഒരു ഹീസ്റ്റ് (Heist) ത്രില്ലറാണെന്നാണ് ടീസർ നൽകുന്ന സൂചന. സുപ്രിയ മേനോൻ ആണ് ചിത്രം നിർമ്മിക്കുന്നത്.
‘എന്ന് നിന്റെ മൊയ്തീൻ’, ‘കൂടെ’ എന്നീ സൂപ്പർഹിറ്റുകൾക്ക് ശേഷം പൃഥ്വിരാജും പാർവതിയും വീണ്ടും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. മമ്മൂട്ടി-മോഹൻലാൽ-മഹേഷ് നാരായണൻ ചിത്രമായ ‘പാട്രിയറ്റി’ന്റെ പ്രദർശനത്തിനിടയിലാണ് ടീസർ ആദ്യമായി തിയേറ്ററുകളിൽ റിലീസ് ചെയ്തത്. തിയേറ്ററുകളിലും സോഷ്യൽ മീഡിയയിലും മികച്ച പ്രതികരണമാണ് ടീസറിന് ലഭിക്കുന്നത്.
പൃഥ്വിരാജ് പ്രൊഡക്ഷൻസും ഇ4 എക്സ്പെരിമെന്റസും ചേർന്ന് നിർമ്മിക്കുന്ന ചിത്രത്തിന് രചന നിർവഹിച്ചിരിക്കുന്നത് സമീർ അബ്ദുളാണ്. ‘റോഷാക്ക്’, ‘ഇബിലീസ്’ എന്നീ ചിത്രങ്ങൾക്ക് ശേഷം സമീർ അബ്ദുളും നിസാം ബഷീറും വീണ്ടും ഒന്നിക്കുന്ന ചിത്രമാണിത്. ജേക്സ് ബിജോയ് സംഗീതവും ദിനേശ് പുരുഷോത്തമൻ ഛായാഗ്രഹണവും നിർവഹിക്കുന്നു.
അശോകൻ, വിജയരാഘവൻ, നിഷാന്ത് സാഗർ, ഖാലിദ് റഹ്മാൻ തുടങ്ങി വൻ താരനിര തന്നെ ചിത്രത്തിൽ അണിനിരക്കുന്നുണ്ട്. മലയാള സിനിമയിൽ ഇതുവരെ പരീക്ഷിച്ചിട്ടില്ലാത്ത മേക്കിംഗ് ശൈലിയാണ് ചിത്രത്തിന്റേതെന്നാണ് റിപ്പോർട്ടുകൾ. ഈ വർഷം ജൂലൈ മാസത്തിൽ ചിത്രം ആഗോളതലത്തിൽ തിയേറ്ററുകളിലെത്തും.
Story Summary: The teaser for ‘I Nobody’, directed by Nizam Basheer and starring Prithviraj Sukumaran, Parvathy Thiruvothu, and Hakkim Shajahan, has been released. Produced by Supriya Menon, the film is expected to be a heist thriller centered around a bank robbery. The teaser was initially showcased during the screening of the movie ‘Patriot’. The film is slated for a worldwide release in July 2026.
