കൊച്ചി: തന്റെ അനുവാദമില്ലാതെ ചിത്രവും പേരും ഉപയോഗിച്ച് ലോൺ പരസ്യങ്ങൾ പ്രചരിപ്പിക്കുന്നതിനെതിരെ മുന്നറിയിപ്പുമായി നടൻ അജു വർഗീസ് (Aju Varghese). ഫേസ്ബുക്കിലൂടെയാണ് താരം ഈ തട്ടിപ്പിനെക്കുറിച്ച് ആരാധകരെ ബോധവാന്മാരാക്കിയത്. ഇത്തരം പരസ്യങ്ങളിൽ വിശ്വസിച്ച് ആരും ചതിക്കുഴിയിൽ വീഴരുതെന്ന് അദ്ദേഹം അഭ്യർത്ഥിച്ചു.
‘ഈസി പേഴ്സണൽ ലോൺ’ എന്ന പേരിൽ കേരളത്തിൽ എവിടെയും മൂന്ന് ലക്ഷം രൂപ വരെ വായ്പ നൽകാമെന്നാണ് പരസ്യം അവകാശപ്പെടുന്നത്. ‘എഎം ട്രസ്റ്റ് ലോൺ സർവീസസ്’ എന്ന സ്ഥാപനത്തിന്റെ ഈ പരസ്യത്തിൽ അജു വർഗീസിന്റെ ചിത്രം വലിയ രീതിയിൽ ഉപയോഗിച്ചിട്ടുണ്ട്. എന്നാൽ തനിക്ക് ഈ സ്ഥാപനവുമായോ പരസ്യവുമായോ യാതൊരു ബന്ധവുമില്ലെന്ന് താരം വ്യക്തമാക്കി.
സോഷ്യൽ മീഡിയ വഴി പ്രചരിക്കുന്ന ഇത്തരം പരസ്യങ്ങൾ കണ്ട് ആരും പണം നഷ്ടപ്പെടുത്തരുത്. വ്യാജ പരസ്യം നൽകിയവർക്കെതിരെ കർശനമായ നിയമനടപടി സ്വീകരിക്കുമെന്നും അജു വർഗീസ് കൂട്ടിച്ചേർത്തു. വായ്പാ തട്ടിപ്പുകൾ വർദ്ധിച്ചുവരുന്ന സാഹചര്യത്തിൽ താരത്തിന്റെ ഈ ജാഗ്രതാ നിർദ്ദേശം സോഷ്യൽ മീഡിയയിൽ ഇതിനോടകം ശ്രദ്ധേയമായിട്ടുണ്ട്.
Story Summary: Actor Aju Varghese has warned the public against a fraudulent loan advertisement using his name and picture. Clarifying that he has no association with ‘AM Trust Loan Services,’ the actor urged people not to fall for these scams promising easy personal loans up to ₹3 lakhs. He also announced that legal action would be taken against the perpetrators.
