സംസ്ഥാനത്ത് ഉടലെടുത്ത താത്കാലിക വൈദ്യുതി പ്രതിസന്ധി നിയന്ത്രണവിധേയമായതായി വൈദ്യുതി മന്ത്രി കെ കൃഷ്ണൻകുട്ടി

കനത്ത ചൂടിനെ തുടർന്ന് സംസ്ഥാനത്ത് ഉടലെടുത്ത താത്കാലിക വൈദ്യുതി പ്രതിസന്ധി നിയന്ത്രണവിധേയമായതായി വൈദ്യുതി മന്ത്രി കെ കൃഷ്ണൻകുട്ടി വിളിച്ചുചേർത്ത കെഎസ്ഇബി ഉന്നത ഉദ്യോഗസ്ഥരുടെ യോഗം വിലയിരുത്തി. ചൂടുകാലമായി സംസ്ഥാനത്ത് വൈദ്യുതി ഉപയോഗം വർധിക്കുന്നതും അതുമൂലമുണ്ടാകുന്ന പ്രതിസന്ധികളും പരിഹാരങ്ങളും സംബന്ധിച്ച് കെഎസ്ഇബിയിലെ വിവിധ ഉദ്യോഗസ്ഥരുമായും തൊഴിലാളി സംഘടനകളുമായും മന്ത്രി ചർച്ച ചെയ്യുകയും അടിയന്തരമായി പരിഹരിക്കാവുന്ന പ്രശ്നങ്ങൾ പരിഹരിക്കാൻ ഉദ്യോഗസ്ഥ തലത്തിൽ നിർദേശം നൽകുകയും ചെയ്തു. തുടർന്ന് പ്രസരണ വിതരണ മേഖലയിലെ ഡെപ്യൂട്ടി ചീഫ് എൻജിനീയർ മുതൽ മുതിർന്ന ഉദ്യോഗസ്ഥരുമായി ചർച്ച നടത്തി. ജ്യോതിലാൽ ഐഎഎസ്, ഊർജ വകുപ്പ് അഡീഷണൽ ചീഫ് സെക്രട്ടറി ഡോ രാജൻ എൻ ഖോബ്രഗഡെ ഐഎഎസ്, സിഎംഡി കെഎസ്ഇബിഎൽ, കെഎസ്ഇബി ഡയറക്ടർമാർ തുടങ്ങിയവരും ചർച്ചയിൽ പങ്കെടുത്തു.

സംസ്ഥാനത്തുടനീളമുള്ള വൻകിട വൈദ്യുതി ഉപഭോക്താക്കൾ, കേരള വാട്ടർ അതോറിറ്റി, ലിഫ്റ്റ് ഇറിഗേഷൻ, മറ്റ് പൊതുമേഖലാ സ്ഥാപനങ്ങൾ എന്നിവരുമായി നടത്തിയ ചർച്ചയുടെ അടിസ്ഥാനത്തിൽ വിവിധ ഡെപ്യൂട്ടി ചീഫ് എൻജിനീയർമാർ നൽകിയ വിവരമനുസരിച്ച്, പീക്ക് വൈദ്യുതി ഉപഭോഗത്തിൽ ഏകദേശം 117 മെഗാവാട്ടിൻ്റെ കുറവുണ്ടായി. തിരക്കേറിയ സമയങ്ങളിൽ ഡ്യൂട്ടി ഷിഫ്റ്റുകൾ ഒഴിവാക്കിക്കൊണ്ട് പല സ്വകാര്യ സ്ഥാപനങ്ങളും കെഎസ്ഇബിയുടെ ആഹ്വാനത്തോട് പ്രതികരിച്ചു. ട്രാൻസ്‌ഫോർമർ, ട്രാൻസ്‌ഫോർമർ ഓയിൽ, വൈദ്യുതി മീറ്റർ, മറ്റ് സാധനങ്ങൾ എന്നിവയുടെ ലഭ്യതയും യോഗത്തിൽ ചർച്ച ചെയ്തു. കെഎസ്ഇബി ഓർഡർ നൽകിയ കെഇഎല്ലിൽ നിന്ന് ട്രാൻസ്ഫോർമറുകൾ ലഭ്യമല്ലാത്തതിനെ തുടർന്ന് മറ്റ് സ്ഥാപനങ്ങളിൽ നിന്ന് ട്രാൻസ്ഫോർമറുകൾ അടിയന്തരമായി വാങ്ങിയിരുന്നു. തകരാറിലായ മീറ്ററുകൾ മാറ്റി സ്ഥാപിക്കാൻ നടപടി സ്വീകരിച്ചതായി കെഎസ്ഇബി ഡയറക്ടർമാർ ഉറപ്പുനൽകി. അടിയന്തര ആവശ്യങ്ങൾക്കായി പ്രാദേശിക തലത്തിൽ സാധനങ്ങൾ വാങ്ങുന്നതിനുള്ള നിയന്ത്രണങ്ങൾ നീക്കി ഉത്തരവിറക്കിയതായി കെഎസ്ഇബിഎൽ സിഎംഡി അറിയിച്ചു.

 
ഈ വർഷത്തെ വേനലിലെ പോലെ വോൾട്ടേജ് പ്രശ്‌നങ്ങളും തുടർച്ചയായ വൈദ്യുതി മുടക്കവും ആവർത്തിക്കാതിരിക്കാൻ നടപടി സ്വീകരിക്കണമെന്ന് യോഗത്തിൽ നിർദേശിച്ചു. പ്രസരണ മേഖലയിലെ വിവിധ സബ്‌സ്റ്റേഷനുകൾ അടിയന്തരമായി പുരോഗമിച്ചു കൊണ്ടിരിക്കുന്നതിനായുള്ള നിർദേശങ്ങളും നൽകിയിട്ടുണ്ട്. കെഎസ്ഇബിയുടെ അഞ്ച് ടിഎംആർ (ട്രാൻസ്ഫോർമർ ആൻഡ് മീറ്റർ ടെസ്റ്റിങ് റിപ്പയർ) യൂണിറ്റുകളിൽ കൂടുതൽ ഷിഫ്റ്റുകൾ ഏർപ്പെടുത്തി ട്രാൻസ്ഫോർമറുകളുടെ അറ്റകുറ്റപ്പണി വേഗത്തിലാക്കാനും യോഗത്തിൽ നിർദേശം ഉയർന്നു. ഇതിനുപുറമെ ജില്ലകളിലെ തിരക്കേറിയ സമയങ്ങളിൽ കൺട്രോൾ റൂം സംവിധാനത്തോടെ ഡെപ്യൂട്ടി ചീഫ് എൻജിനീയർ തലത്തിലുള്ള മുതിർന്ന ഉദ്യോഗസ്ഥർ പരിശോധന നടത്തണമെന്നും യോഗം നിർദേശിച്ചു.